Sigur­borg Ósk til SSNE

Þetta kemur fram á vef samtakanna. Sigurborg Ósk var formaður skipulags-og samgönguráðs Reykjavíkurborgar frá 2018 til 2021. Það árið hætti hún óvænt í borgarstjórn og sagði frá því í viðtali við Fréttablaðið að það væri vegna veikinda.

Í tilkynningu SSNE segir að Sigurborg muni koma inn í ýmis verkefni. Þau séu einkum í tengslum við umhverfis-og skipulagsmál. Auk þess muni Sigurborg koma að verkefnum í tengslum við Sóknaráætlun Norðurlands eystra líkt og fjölmenningarráði Norðurlands eystra.

Fram kemur að Sigurborg sé fædd og uppalin á Kjalarnesi en sé nú búsett á Húsavík. Hún sé með BS gráðu í umhverfisskipulagi frá Landbúnaðarháskóla Íslands og Meistaragráðu í landsslagsarkitektúr frá Arkitekta- og hönnunarskólanum í Osló.

„Sigurborg hefur víðtæka reynslu af umhverfis- og skipulagsmálum, bæði sem kjörin fulltrúi og fagmanneskja. Hún starfaði áður í borgarstjórn og var formaður skipulags- og samgönguráðs Reykjavíkur, varaformaður umhverfis- og heilbrigðisráðs Reykjavíkur og ásamt því að vera formaður Svæðisskipulagsnefndar Höfuðborgarsvæðisins.“

Hún hafi leitt vinnu við mörg af mikilvægustu umhverfismálum samtímans, þar á meðal endurskoðun aðalskipulags Reykjavíkur, mótun nýrrar aðgerðaráætlunar í loftlagsmálum, mótun nýrrar hjólreiðaáætlunar, mótun nýrrar umferðaröryggisáætlunar, undirbúning Borgarlínu og forgangsröðun vistvænna ferðamáta.

Segir SSNE að Sigurborg hafi mikinn metnað í öllu sem viðkemur umhverfismálum og mannréttindum. Haft er eftir Sigurborgu að lykilinn að því að ná árangri í umhverfismálum sé að auka jafnrétti kynjanna og gefa íbúum rödd í allri stefnumótun hjá sveitarfélögum. Hún hlakki mikið til að fá að taka þátt í því öfluga starfi sem einkenni sveitarfélögin á Norðurlandi eystra.