Svartstakkarnir herða tökin

 Jón telur einsýnt að hún hljóti að íhuga stöðu sína. Jón hefur sett inn nokkrar færslur vegna málsins á Facebook-síðu sína þar sem hann vekur athygli á því að Svandís hafi brotið lög samkvæmt áliti umboðsmanns í hvalveiðimálinu. 

Hinir svonefndu svartstakkar í Sjálfstæðisflokknum, sem hafa sjálfir kallað sig Fýlupúkafélagið, eru samkvæmt þessu órólegir mjög en ekki hefur náðst í formann flokksins vegna málsins; til að inna hann eftir því hvað honum sýnist um stöðu Svandísar? 

Katrín Jakobsdóttir forsætisráðherra rifjaði upp að Vinstri græn hafi varið Jón vantrausti á sínum tíma með vísan til þess að Sjálfstæðisflokkurinn hljóti að gjalda líku líkt. 

Segir málin ólík

Jón gefur ekki mikið fyrir þetta: 

„Vissulega vörðu þingmenn VG mig vantrausti á sínum tíma. Ég fékk skýr skilaboð frá þeim, með þjósti, um að það hefði alls ekki þótt sjálfsagt í þeirra röðum. Þetta mál snérist um það hvort ég hefði brotið þingskaparlög varðandi upplýsingar til þingsins vegna veitingu ríkisborgararéttar á vettvangi þess. Lagastofnun Háskóla Íslands komst síðar að þeirri niðurstöðu að ég hefði EKKI brotið lög í málsmeðferð ráðuneytisins.“ 

Jón vill sem sagt meina að hér sé ekki um sambærilegt mál að ræða. Jón vindur þá kvæði sínu í kross og beinir spjótum að Viðreisn. 

„Það er áhugavert að fylgjast með viðbrögðum þingmanna Viðreisnar nú og bera þau saman við viðbrögð þeirra og ræður á þeim tíma. Þá skorti ekki á hástemmdar yfirlýsingar þeirra og stuðning við vantraust tilllögu. Nú þegja þau þunnu hljóði þegar fyrir liggur álit umboðsmanns um skýr brot á lögum og á stjórnarskrá landsins og segja þetta mál ríkisstjórnarflokkanna. Það eru ekki mikil prinsipp hjá þessu fólki.“

Hvaðumismi Sveins Andra

Staða Svandísar er mál málanna og einn þeirra sem blandar sér í umræðuna er Sveinn Andri Sveinsson lögmaður sem hefur fylgt Viðreisn að málum. 

Hann telur Sjálfstæðismenn ekki samkvæma sjálfum sér, segir þá hafa farið mikinn vegna álits umboðsmanns og sérstaklega hafi þeir gert sér mat úr þeim ummælum hennar að lögin séu úrelt. Krefjist þeir þess að Svandís segi af sér eða fari í stólaleik eins og formaður þeirra, segir Sveinn:

„Fyrir 10 árum síðan komst kærunefnd jafnréttismála að þeirri niðurstöðu að Björn Bjarnason dómsmálaráðherra hefði brotið jafnréttislög þegar hann skipaði karl í embætti hæstaréttardómara en ekki konu.

Björn svaraði því til af alkunnu lítillæti að hann gæfi ekki mikið fyrir álit kærunefndarinnar; jafnréttislögin væru „barn síns tíma".

Sveinn Andri segist ekki minnast þess að Sjálfstæðismenn hafi haft uppi háværar kröfur um afsögn Björns.