Viðskipti innlent

YoYo kveður Egilsgötuna

Kolbeinn Tumi Daðason skrifar
YoYo er sjálfsafgreiðsluísbúð þar sem maður dælir ísnum og mokar sælgæti.
YoYo er sjálfsafgreiðsluísbúð þar sem maður dælir ísnum og mokar sælgæti. YoYo

Ísbúðinni YoYo á Egilsgötu við Snorrabraut í Reykjavík hefur verið lokað. Greint er frá lokuninni á miða á inngangi ísbúðarinnar. Eigendaskipti urðu á búðinni í fyrra.

YoYo-ísaðdáendur sem ætluðu að sækja laugardagsísinn í YoYo í gærkvöldi urðu frá að hverfa þar sem öll ljós voru slökkt, og enginn heima. Fram kom á miða sem hengdur hafði verið upp í rúðu búðarinnar að versluninni hefði verið lokað. Til stæði að opna nýtt útibú en óvíst væri hvar.

Fyrsta ísbúð YoYo var opnuð á Nýbýlavegi í Kópavogi árið 2010 og er enn opin. Í framhaldinu var önnur opnuð á Egilsgötu í Reykjavík.

Nokkur útrás var hjá YoYo sem opnaði verslanir bæði á Alicante og Benidorm. Til stóð að opna fimmtán jógúrtísbúðir í Eystrasaltslöndunum á næstu árum.

Feðgarnir Einar Ásgeirsson, Kristján Ingvi Einarsson og Ásgeir Ingi Einarsson komu YoYo á fót fyrir þrettán árum. Nýr eigandi YoYo er Enok Jóhannsson í gegnum fyrirtækið Bláfoss ehf.

Leiðrétting: Upphaflega var sagt í fréttinni að YoYo seldi jógúrtís þegar hið rétta er að ísbúðin hefur ekki selt jógúrtís í áraraðir. YoYo framleiðir nú og selur einungis ítalskan ís.

Ís Reykjavík Kópavogur

Tengdar fréttir

Yoyo opnaði á Spáni

Í gær opnuðu bræðurnir Kristján og Ásgeir Einarssyni ísbúðina Yoyo á Benidorm á Spáni en stefnt er að því að opna aðra búð á Alicante eftir tvær vikur. Bræðurnir breyttu húsnæðinu á Benidorm mikið en fyrirmyndin eru Yoyo ísbúðirnar á Íslandi sem Íslendingar þekkja vel, en bræðurnir eiga þær líka. Lítil hefð er fyrir sjálfsafgreiðslu-ísbúðum á Spáni og því er líklegt að Spánverjar taki vel í þessar nýjung.

Ísútrás yoyo heldur áfram

Tvær Yoyo-ísbúðir verða opnaðar á Benidorm og Alicante á Spáni fyrstu vikuna í mars. Þar í landi er lítil hefð fyrir sjálfsafgreiðslu-ísbúðum og því líklegt að sólarlandafarar taki þessari nýjung fegins hendi.



Mest lesið


Fleiri fréttir

Sjá meira


×

Mest lesið