Þórir Hergeirs í felu­leik eins lengi og reglurnar leyfa

Noregur mætir Angóla í fyrsta leiknum sínum í milliriðli í kvöld og Þórir er ekki enn búinn að tilkynna hvaða leikmenn spila leikinn.

Hingað til á heimsmeistaramótinu hefur Þórir tilkynnt leikmannahópinn sinn að morgni leikdags en nú ætlar Selfyssingurinn að breyta um taktík. NRK segir frá.

Það eru leikmenn í norska liðinu sem hafa verið að glíma við meiðsli og Þórir hefur verið að hvíla lykilmenn en fyrirstaðan var ekki mikið fyrir liðið í riðlakeppninni.

Nú fer að reyna meira á norsku stelpurnar á móti sterkari andstæðingum. Það á samt ekki að auðvelda þeim að reikna út norska liðið.

Þórir greindi frá því á blaðamannafundi fyrir milliriðilinn að hann ætli ekki að tilkynna liðið sitt fyrr en klukkutíma fyrir leik. Samkvæmt reglum þá hefur hann rétt á því.

Noregur mætir síðan Slóveníu á morgun og Frakklandi á föstudaginn.