Stefnir í yndis­lega aðventugleði hjá Grind­víkingum

Undanfarin ár hafa Grindvíkingar kveikt á jólatré við hátíðlega athöfn. Þeir hafa gengið saman í friðargöngu með þátttöku barna í leik- og grunnskóla og átt saman fallega stund þegar kveikt er á jólatrénu. Jólasveinar hafa komið í heimsókn og dansað með börnunum í kringum jólatréð áður en boðið hefur verið upp á kakó og kökur.

Gleðin hefur því verið mikil og verður engin undantekning á því í ár þó vettvangurinn verði annar í ljósi þess að íbúar Grindvíkinga búa hér og þar á meðan hættustigi almannavarna stendur í bænum.

Grindvíkingar ætla að hittast í íþróttahúsinu á Ásvöllum í Hafnarfirði og eiga saman notalega stund á aðventunni. Dansað verður í kringum jólatré undir stjórn Siggu Beinteins og Grétars Örvarssonar og eins munu jólasveinar gleðja börnin. Þá skemmta Gunni og Felix, Sigríður Thorlacius og Sigurður Guðmundsson ásamt tónlistarfólki frá Grindavík. Ætlunin er að eiga saman bæði hátíðlega og gleðilega samverustund.

Yngsta kynslóðin einbeitir sér að söng og dansi meðan eldri íbúar Grindavíkur spjalla saman yfir kaffi og kökum. Gleðin hefst klukkan 15 og stendur til 17.

Aðventugleði Grindvíkinga er samstarfverkefni fjölmargra aðila sem leggja viðburðinum lið: listamenn gefa sína vinnu, Verkalýðsfélag Grindavíkur, Kvenfélag Grindavíkur leggja til rútur, Sjómanna- og vélstjórafélag Grindavíkur styrkir viðburðinn og UMFG, Haukar og fjöldi fyrirtækja leggja viðburðinum lið.

„Samtakamáttur og stuðningur við Grindvíkinga hefur einkennt undirbúninginn og dýrmætt fyrir Grindvíkinga að geta hist á aðventunni, átt notalega samverustund og fundið kröftugan hjartslátt samfélagsins í Grindavík slá, þó fjarri heimahögum sé,“ segir í tilkynningu.

Frumkvæði að viðburðinum kemur frá Grétari Örvarssyni sem hefur unnið náið að undirbúningi með fulltrúum Grindavíkurbæjar og Kvikunnar, menningarhúss Grindavíkur.