Fer heim „um leið og þetta hel­vítis eld­gos drullar sér upp“

Eins og greint hefur verið frá hafa almannavarnir heimilað íbúum í Grindavík að sækja nauðsynjar í fylgd með björgunarsveitum í dag. Aðgerðirnar standa yfir til klukkan 16:00, á meðan enn er dagsbirta.

Langar aftur heim

Hverju ertu að reyna að bjarga?

„Bara því sem mér er dýrmætt. Myndir af foreldrum mínum. Reyna bara að ná því sem ég get, ég veit ekki hvað,“ segir Steinunn og eðli málsins samkvæmt er um tilfinningaríka stund að ræða.

Hún segir ekkert erfitt að koma aftur á heimilið sitt. Hana langar bara að komast aftur heim til Grindavíkur, þar sem hún ætlar að vera.

Þig langar að komast aftur heim?

„Já. Ég ætla mér að koma aftur heim. Ég ætla ekki að yfirgefa Grindavík.“

Heima að borða pizzur á föstudagskvöld

Steinunn segir það koma sér á óvart hve lítið sjái á heimilinu eftir skjálftana. Myndirnar hennar séu til að mynda enn á sínum stað.

Er þetta betra en þú áttir von á?

„Miklu betra. Ég var hérna allan föstudaginn fram að miðnætti. Við sátum hérna bara og vorum að borða pizzu í öllum þessum skjálftum og öðru þangað til að við fengum tilkynningu um að koma okkur út. Þá náttúrulega rauk maður bara út.“

Þið ætluðuð ekkert að fara fyrr en ykkur var sagt að rýma?

„Við ætluðum ekkert að fara. Við ætluðum bara að vera. Ég meina, maður er búinn að þola alla þessa jarðskjálfta hingað til. Og ég get alveg þolað jarðskjálftana. Það er ekkert mál. Mér finnst það ekki neitt. En mér finnst bara leiðinlegt að þurfa að yfirgefa þetta. Ég vil bara vera hérna.“

Þig langar bara aftur heim?

„Mig langar bara aftur heim.“

Þetta helvítis eldgos má drulla sér upp

Steinunn segist núna dvelja í Þorlákshöfn. Þar dvelur hún í hjólhýsi á lóð dóttur sinnar sem þar býr.

Hvenær heldurðu að þú komir svo aftur hingað?

„Ég vona bara sem fyrst. Um leið og þetta helvítis eldgos getur drullað sér upp og það verður hægt að koma hingað aftur, þá geri ég það um leið.“

Þú bíður eftir eldgosi?

„Ég bíð eftir því. Ég vil bara koma heim.“