Telur að Grind­víkingar ættu að sofa annars staðar en heima hjá sér

„Mér finnst bráðnauðsynlegt að fara að byrja á þessu. Þetta eru fyrirbyggjandi aðgerðir. Ef við göngum ekki í svona aðgerðir strax þá verða engar forvarnaraðgerðir heldur björgunaraðgerðir. Við erum með svona forvarnaraðgeðrir í tengslum við snjóflóð,“ segir Þorvaldur í samtali við fréttastofu.

Kröftug skjálftahrina hófst á Reykjanesi í nótt og mældist sá stærsti 4,8 að stærð.

Líkurnar á gosi meiri en ekki

Hann segir að spennan sem sé að myndast í skorpunni sé mikil og það sé bara spurning um hvaða skjálfti það verði sem verði til þess að eldgos hefjist án mikils fyrirvara.

„Það færist alltaf nær og nær gosi. Ég er ansi hræddur um það en vona hitt. Staðan er orðin þannig að ég held að líkurnar séu orðnar meiri á því að við fáum eldgos heldur en ekki. Persónulega finnst mér ekki seinna vænna að fara að setja upp neyðargarða til að verja Grindavík,“ segir Þorvaldur.

„Ekki víst að fari eins vel og í Eyjum“

Hann segist telja að réttast væri að rýma Grindavík að minnsta kosti á nóttunni og segir líka að það sé ekki hægt að treysta á heppnina eina. Það hafi ekki verið góður undirbúningur og forvarnir sem bjargaði Eyjamönnum árið 1973.

„Ég er á því að það væri réttast að rýma bæinn eins og hægt er. Þó starfsemi haldi kannski áfram að degi til að fólk sofi annars staðar á nóttunni. Það sama gildir um Svartsengi og Bláa lónið,“ segir Þorvaldur.

„Það er ekki víst að fari eins vel og í Eyjum. Það var bara stálheppni. Það var bara heppni að allir bátar voru í höfn. Það er alltaf gott að hafa heppnina með sér í liði en það er ekki gott að treysta á hana.“

Hvetur til stillingar

Í hádegisfréttum Bylgjunnar sagði Benedikt Gunnar Ófeigsson jarðeðlisfræðingur að umræðan í samfélaginu um yfirstandandi jarðhræringar hafi einkennst mjög af tali um allra verstu sviðsmyndina sem engin söguleg gögn séu um að hafi áður gerst en hann útilokaði þú ekki að hún gæti raungerst. Hún sé einfaldlega ekki líklegust.

„Líklegasta niðurstaðan er að þetta hætti og ef það fer af stað atburðarás sem endar í gosi þá er lang líklegast að hún taki talsvert marga klukkutíma og jafnvel daga, það er bara það sem reynslan úr öðrum gosum fyrri ára segir okkur.“