Jói og Olla selja glæsihús í Kópavogi

Í lýsingu eignarinnar á fasteiganvef Vísis kemur fram að eignin sé fyrir vandláta.

Um er að ræða fallegt 239 fermetra hús á þremur pöllum með allt að fimm metra lofthæð þar sem birtan flæðir á fallegan hátt. Samtals eru fimm svefnherbergi og þrjú baðherbergi.

Arkitekt hússins er Guðmundur Gunnlaugsson sem miðaði hönnun hússins að því að nýta staðsetningu, garð og útisvæði til hins ýtrasta en við húsið eru glæsilegar og skjólgóðar timburverandir úr viðhaldsfríum harðviði, heitur pottur og gufubaðshús með sturtu.

Eldhús, stofa og borðstofa er í samliggjandi og björtu rými umvafið fallegri hönnun.

Dönsk hönnun í forgrunni

Heimili Jóa og Ollu, eins og þau eru kölluð, er afar glæsilegt og hlýlegt og virðist dönsk hönnun heilla.

Á veggnum í stofunni má sjá hvítar og gráar Montana hillur, hönnun frá árinu 1982. Svanurinn og Sjöan, stólar hannaðir af danska hönnuðinum Arna Jacobsen í koníaksbrúnu leðri í rýminu færir því skemmtilega stemmningu.

Þá má sjá glæsilega hönnun frá danska vöruhúsinu Bang & Olufsen, hátalarann Beoplay A9, í dökk gráu.

Ljósin frá ítalska merkinu Flos, Arco gólflampinn og 2097 loftljósið, eru algjört augnayndi og setja punktinn yfir i-ið.