Fimm hundraðasti meistaraflokksleikur Daníels í kvöld

Það má búast við að Garðbæingar fjölmenni á leik kvöldsins enda möguleiki á að landa mikilvægum sigri og heiðra einn allra besta son félagsins.

Stjarnan mætir KR í kvöld í lokaleik tuttugustu umferðar Bestu deildar karla en með sigri tryggja Stjörnumenn sér þriggja stiga forskot á FH og KR í baráttunni um fjórða sætið.

Daníel hefur leikið 499 meistaraflokksleiki í öllum keppnum fyrir Stjörnuna samkvæmt heimasíðu KSÍ en hann hefur spilað með meistaraflokksliði félagsins frá árinu 2004.

Á tíma Daníels með meistaraflokki þá vann Stjarnan sér sæti í efstu deild, festi sig í sessi í efstu deild, varð að toppliði í deildinni og vann báða titla sína, Íslandsmeistaratitil 2014 og bikarmeistaratitil 2018.

Daníel hefur alls spilað 287 leiki fyrir Stjörnuna í efstu deild sem eru 114 fleiri leikir en næsti maður á lista. Hann spilaði einnig 59 leiki í B-deildinni áður en Stjarnann komst upp 2008, hefur spilað 42 bikarleiki, 89 leiki í deildabikar, 1 leik í Meistarakeppni KSÍ og loks á Daníel að baki 21 af 22 Evrópuleikjum Stjörnunnar í sögunni samkvæmt skráningu KSÍ.

Leikur Stjörnunnar og KR hefst klukkan 19.15 og verður sýndur beint á Stöð 2 Sport.