Hægja á vef­síðum fyrir­tækja sem Musk er illa við

Um það bil fimm sekúndur tók fyrir notendur X að opna vefsíður sumra fyrirtækja samkvæmt athugun Washington Post. Þetta átti við um samfélagsmiðlana Facebook, Instagram, Bluesky og Substack en einnig fréttamiðla eins og Reuters og New York Times. Fyrirtækin eiga það sameiginlegt að hafa orðið fyrir háðsglósum eða árásum af hálfu Musk, eiganda X.

Nokkrum klukkustundum eftir að Washington Post birti umfjöllun sína hætti X að hægja á sumum vefsíðunum. Hvorki Musk né X svaraði fyrirspurn um hvers vegna það hefði hægt á umferð til valdra vefsíðna.

Talsmaður New York Times sagði að fjölmiðillinn hefði sjálfur veitt því eftirtekt hversu lengi hlekkir á vefsíðu hans opnaðist á X, Fyrirtækið hefði ekki fengið neinar skýringar frá samfélagsmiðlinum. Musk lýsti New York Times fyrr í þessum mánuði sem áróðursmiðli og líkti blaðinu við „niðurgang“ vegna umfjöllunar þess um suðurafrísk málefni. Musk á ættir sínar að rekja þangað.

Rannsókn sem Google gerði á netumferð árið 2016 leiddi í ljós að meira en helmingur notenda hætti við að fara inn á vefsíðu ef hún væri lengur en þrjár sekúndur að opnast.

Þegar Musk tók yfir Twitter í fyrra lýsti hann sjálfum sér sem einhvers konar harðlínutjáningarfrelsissinna. Hann hefur þó ekki hikað við að beita miðlinum gegn þeim sem honum mislíkar persónulega. Þannig bannaði hann sjálfvirkan reikning sem birti opinberar upplýsingar um ferðir einkaþotu hans og bannaði blaðamenn sem fjölluðu um þá uppákomu.