„Jörðin opnast beint fyrir framan okkur“

„Þetta var tölu­vert meira en maður eigin­lega í­myndaði sér að maður gæti fundið,“ segir Jón Atli Magnús­son í sam­tali við Vísi. Hann og eigin­kona hans Ilmur Dögg Níels­dóttir voru á breyttum jeppa og voru á akstri austan við Keili þegar skjálftinn, sem var 5,2 að stærð, reið yfir. Ríkis­út­varpið ræddi fyrst við hjónin.

„Við vorum rúm­lega kíló­metra frá upp­tökunum að keyra þegar þetta ríður yfir, bíllinn hentist upp í loft og jörðin opnast beint fyrir framan okkur. Við sjáum sprunguna opnast nokkra metra frá bílnum og gríðar­legt ryk úti um allt,“ segir Jón Atli.

Hann segist telja að sprungan hafi verið rúm­lega tuttugu sentí­metrar að breidd þar sem mest var. Þau hjón urðu vitni að gríðar­legu grjót­hruni í Keilu og í Grænu­dyngju og sáu hvar einn grjót­hnullungur hrundi úr dyngjunni, yfir veginn og út í nær­liggjandi mosa.

„Það söng í öllum fjöllum og grjót­hrunið var tölu­vert. Það er klárt að það er til­efni til þess að vera við grjót­hruni þarna,“ segir Jón Atli sem bætir því við að þetta hafi verið ó­trú­leg upp­lifun, en þrátt fyrir það hafi þau hjón ekki orðið smeyk.

„Þetta reið hraðar og harðar yfir á skemmri tíma af því að við vorum svo ná­lægt upp­tökunum. Við héldum bara ró okkar á meðan þessu stóð.“