Rétta yfir Navalní á bak við luktar dyr í fangelsi

Nýja ákæran á hendur Navalní tengist starfsemi andspillingarsamtaka hans sem rússnesk stjórnvöld skilgreindu sem ólögleg öfgasamtök fyrir tveimur árum. Stuðningsmenn Navalní segja að nýja ákæran geri starfsemi samtakanna glæpsamleg afturvirkt allt frá stofnun árið 2011. ´

Fyrir afplánar Navalní níu ára fangelsisdóm fyrir fjársvik og að vanvirða dómstól. Hann hefur haldið því fram að það mál hafi átt sér pólitískar rætur.

Fréttamenn fengu ekki að vera inni í dómsalnum í Melekhovo-hámarksöryggisfangelsinu um 250 kílómetra austur af Moskvu þar sem Navalní er haldið. Þess í stað fylgdust þeir með útsendingu frá réttarhöldunum úr annarri byggingu. Foreldrar Navalní fengu heldur ekki að vera viðstaddir.

Dómarinn í málinu lokaði þinghaldinu fljótlega að kröfu saksóknara sem vísaði til öryggisástæðna. Fréttamönnum var þá vísað úr fangelsinu. Navalní sakaði stjórnvöld um að reyna að fela hversu veikt málið gegn honum væri með því að takmarka aðgang almennings að réttarhöldunum.

Rússneskir ríkisfjölmiðlar sögðu frá réttarhöldunum en vinsælustu sjónvarpsstöðvarnar eru á valdi ríkisins gerðu það ekki, að sögn AP-fréttastofunnar.

„Fráleitar“ ásakanir um öfgahyggju

Áður en þinghaldinu var lokað sagði Navalní nýju ákæruna um öfgahyggju „ fráleita“ og að hún gæti haldið honum í fangelsi í þrjátíu ár til viðbótar. Hann hélt því jafnframt fram að einn rannsakendanna hefði sagt sér að hann gæti einnig átt yfir höfði sér herréttarhöld vegna hryðjuverkaákæru sem gæti þýtt lífstíðardóm.

Bandamenn Navalní birtu skilaboð frá honum á samfélagsmiðlum þar sem hann hvatti landa sína til þess að mótmæla stríðsrekstri Vladímírs Pútín forseta í Úkraínu.

Navalní hefur verið haldið í litlum einangrunarklefa um margra mánaða skeið. Það er refsing fyrir ýmis ætluð brot eins og hneppa ekki fangabúning sinn rétt, kynna sig ekki almennilega fyrir fangaverði og að þvo sér ekki í framan á tilætluðum tíma.

Stuðningsmenn Navalní saka fangelsisyfirvöld um að veita honum ekki heilbrigðisþjónustu sem hann þarf á að halda. AP-fréttastofan segir að Navalní hafi virst horaður en þó þróttmikill í mótbárum sínum þegar hann talaði fyrir dómi á mánudag.

Rússnesk stjórnvöld handtóku Navalní þegar hann kom til landsins frá Þýskalandi þar sem hann lá á sjúkrahúsi vegna eitrunar í byrjun árs 2021. Navalní sakaði stjórnvöld í Kreml um að hafa eitrað fyrir sér með taugaeitri en því neita þau. 

Honum var svo stungið í fangelsi fyrir að heiðra ekki skilmála reynslulausnar sem hann hlaut vegna eldri fangelsisdóms á meðan hann lá meðvitundarlaus á sjúkrahúsi í Berlín. Honum var gert að afplána eftirstöðvar dómsins en var síðar dæmdur í níu ára fangelsi til viðbótar.