Áfram misskipting á 17. júní

„Það verður ágætlega hlýtt en vel hlýtt austan Skagafjarðar,“ segir Óli Þór Árnason, veðurfræðingur um veðrið á þjóðhátíðardaginn 17. júní sem haldinn verður á morgun. Ekki er búist við sólskini fyrir sunnan.

„Þetta er eins og hefur verið, þungbúið hér fyrir sunnan þótt það verði hlýtt. Svipað og í dag en verður ívið svalara á morgun. Allt austan við Skagafjörð lítur vel út, þar er vel hlýtt, en aðrir fá mun minna.“ 

Er ekkert lát á þessum hita fyrir austan?

„Jú, jú, þetta er alveg að detta upp fyrir,“ segir Óli Þór. „Sunnudagurinn verður heldur svalari og það verður komin einhver úrkoma allvíða fyrir norðan. Síðan eru ekki sérstök hlýindi í kortunum, fer ekki yfir tuttugu stig, þó hlýjast á norðausturlandi áfram.“