Sjáðu fyrsta mark Þorleifs á tímabilinu

Mark Þorleifs er hans fyrsta á tímabilinu en hann skoraði með skalla á 85. mínútu leiksins. Hann kom inn af bekknum á 58. mínútu en staðan var þá 1-0 fyrir Dallas eftir að Jader Obrian hafði komið liðinu yfir skömmu áður.

Mark Þorleifs var glæsilegt en hann skallaði þá hornspyrnu Hector Herrera í stöngina og inn eftir gott hlaup í teignum.

Þá kom Dagur Dan Þórhallsson af bekknum hjá Orlando City þegar liðið lagði Inter Miami 3-1 í Flórídaslag. Orlando City komst í forystu í fyrri hálfleik en heimamenn í Inter Miami náðu að jafna í upphafi þess síðari. Martin Ojeda og Rafael Santos tryggðu gestunum hins vegar sætan sigur en þriðja mark Orlando kom skömmu eftir að Dagur Dan kom inn sem varamaður.

Guðlaugur Victor Pálsson lék allan leikinn í vörn DC United sem vann öruggan 3-0 sigur á LA Galaxy á heimavelli sínum. Christian Benteke kom DC United yfir á 71. mínútu og Cristian Dajome og Mateusz Klich bættu tveimur mörkum við á næstu níu mínútum.