Prigozhin lýsir yfir sigri í Bakhmut, aftur

Auðjöfurinn segir Rússa stjórna bænum að fullu en í myndbandi sem hann birti í dag gagnrýnir hann Sergei Shoigu, varnarmálaráðherra, og Valery Gerasimov, formann herforingjaráðs Rússlands, fyrir að hafa lítið hjálpað við hernám Bakhmut.

Lítið er eftir af Bakhmut nema rústir en um sjötíu þúsund manns bjuggu þar fyrir innrás Rússa.

Prigozhin hefur áður haldið því fram að Rússar hafi náð tökum á Bakhmut.

Myndefni sýnir að úkraínskir hermenn haldi til í nokkrum bygginum í suðvesturjaðri Bakhmut. Forsvarsmenn úkraínska hersins segja Prigozhin fara með rangt mál. Bardagar geisi enn í Bakhmut. Úkraínumenn hafa þó verið á undanhaldi í bænum.

Úkraínumenn hafa hins vegar verið að sækja fram gegn Rússum norður og suður af bænum á undanförnum dögum. Árangurinn er ekki umfangsmikill en Rússar eru þó sagðir vera að senda liðsauka á svæðið til að stöðva Úkraínumenn.

Hér að neðan má sjá kort frá því á fimmtudaginn sem sýnir hvernig víglínan í og við Bakhmut hefur breyst á undanförnum dögum.

Það hjálpar Úkraínumönnum að Rússar séu að senda liðsauka til Bakhmut en markmið þeirra með vörnum bæjarins hefur verið að halda Rússum við efnið á meðan Úkraínumenn þjálfa upp nýjar sveitir í aðdraganda væntanlegar gagnsóknar á næstu vikum.

Sjá einnig: „Við leiddum óvininn í Bakhmut-gildru“

Bardagar eru enn yfirstandandi við Bakhmut en í frétt New York Times er haft eftir úkraínskum hermönnum að þeir ætli ekki að hætta.

Eins og áður segir réðust Rússar fyrst á Bakhmut síðasta sumar og síðan þá hafa harðir bardagar geisað þar nánast samfleytt. Rússar hafa skipst á því að reyna að sækja fram inn í bænu og á jöðrum hans í gegnum mánuðina og eru sagðir hafa orðið fyrir gífurlegu mannfalli í Bakhmut.

Blaðamenn NYT fengu aðgang að myndefni frá úkraínska hernum sem tekið var yfir þriggja daga tímabil í upphafi maí og segja það sýna Úkraínumenn taka tvær skotgrafir af Rússum. Ákveðið var að nota ekki stórskotalið í upphafi árásarinnar til að koma Rússum á óvart. Það virðist hafa heppnast og tókst þeim að ná fyrstu skotgröfinni.

Sjá einnig: Málaliðar Wagner lýsa hryllilegum átökum við Bakhmut

Tveimur dögum síða sóttu þeir fram gegn þeirri næstu, þar sem enn fleiri rússneskir hermenn voru. Hermenn skýldu sér í og bakvið bryndreka og stukku svo ofan í skotgrafir Rússa þegar þangað var komið. Að bardaganum loknum segja blaðamenn NYT myndefnið sýni skotgrafirnar fullar af líkum rússneskra hermanna.

Einn úkraínskur hermaður sem blaðamennirnir ræddu við sagði að hefðbundin hernaðarviska segði þá sem sækja fram verða fyrir meira mannfalli. Það ætti þó ekki við í þessu tilfelli, því fáir Úkraínumenn hefðu fallið.