KR-ingar slógu 42 ára félagsmet í markaleysi á Hlíðarenda í gær

KR-liðið hefur ekki skorað í 370 mínútur eða síðan að Benoný Breki Andrésson innsiglaði sigur í Keflavík 15. apríl síðastliðinn.

Síðan þá hefur KR-liðið spilað fjóra leiki í röð án þess að ná að skora. Það sem meira er að allir þessir fjórir leikir hafa tapast. Mótherjar KR-liðsins hafa skorað tólf mörk í röð án þess að KR hafi náð að svara fyrir sig.

Þetta er lengsta bið KR eftir deildarmarki frá því að deildin innihélt fyrst tíu lið en gamla félagsmet KR í nútíma fótbolta var orðið næstum því 42 ára gamalt.

Fyrir þetta tímabil hafði lið undir stjórn Rúnars Kristinssonar aldrei spilað meira en tvo deildarleiki í röð án þess að skora mark.

Nú er hins vegar félagsmetið fallið og þetta er orðið sögulega slæm frammistaða fyrir framan mark andstæðinganna.

KR-ingar léku 346 mínútur án þess að skora deildarmark sumarið 1981 en þá bið endaði Óskar Ingimundarson biðina í leik á móti Víkingi. KR gerði tvö markalaus jafntefli í þessari löngu bið eftir marki í júní 1981.

KR þurfti líka að bíða lengi eftir marki sumarið 1988 og líka sumarið 1977 þegar KR féll síðast úr efstu deild.