Segir fjölmiðlafólk öfundsjúkt út í Tucker Carlson

Hann sagði að aðrir myndu á endanum fá aðgang að myndefninu, sem er fangar um fjörutíu þúsund klukkustundir.

Í samtali við blaðamann Washington Post í gær sagði McCarthy að fjölmiðlafólk reyndi alltaf að sitja eitt á fréttum sínum. Tucker Carlson hefði beðið um efnið og hann hefði beðið um að sitja einn á því.

„Svo ég leyfði honum að koma og sjá það en allir munu fá það,“ sagði McCarthy.

Hingað til hefur þingforsetinn forðast það að svara spurningum um samkomulag sitt við Carlson, sem tilkynnti í síðustu viku að hann og hans starfsfólk hefðu aðgang að myndefninu.

Þetta fyrirkomulag hefur verið harðlega gagnrýnt af Demókrötum og forsvarsmönnum fjölmiðla en Carlson hefur iðulega notað vinsælan sjónvarpsþátt sinn á Fox News til að gera lítið úr árásinni á þinghúsið, dreifa samsæriskenningum um árásina og til að ýta undir málstað þeirra sem réðust á þinghúsið.

Í frétt AP fréttaveitunnar segir að McCarthy sé einnig hlynntur því að þeim tæplega þúsund manns sem hafa verið ákærð vegna árásarinnar á þinghúsið aðgang að myndefninu. Þá segir fréttaveitan að þegar McCarthy tilkynnti öðrum Repúblikönum ákvörðun sína um að deila myndefninu með Carlson og Fox hefði því verið fagnað með lófaklappi.

Ýtti undir lygar um kosningasvindl

Þann 6. janúar 2021 réðust stuðningsmenn Donalds Trumps, fyrrverandi forseta, á þinghúsið með því markmiði að koma í veg fyrir formlega staðfestingu úrslita forsetakosninganna í nóvember 2020, þegar Joe Biden sigrað Trump.

Trump hefur iðulega haldið því fram að umfangsmikið kosningasvindl hafi kostað hann sigur en Carlson hefur dreift þeim ásökunum í þætti sínum, þó hann hafi í einrúmi sagt að ásakanirnar væru ósannar. Demókratar hafa einnig sagt að myndefnið geti verið notað til að opinbera öryggisráðstafanir í þinghúsinu.

Er þar verið að ræða um þær leiðir sem þingmenn eru fluttir þegar rýma á húsið eða felustaði í húsinu, staðsetningar öryggismyndavéla og aðrar öryggisráðstafanir.

Sjá einnig: Stjörnur Fox efuðust bak við tjöldin um ásakanir um kosningasvindl

McCarthy gaf lítið fyrir þessar áhyggjur og sagði að Carlson sagðist ekki ætla að opinbera öryggisráðstafanir og að þinglögreglan væri meðvituð um málið. McCarthy sagðist líka ekki trúa því að Carlson myndi afvegaleiða áhorfendur sína varðandi árásina á þinghúsið.

Þingforsetinn gagnrýndi rannsóknarnefndina sem mynduð var til að kafa í saumana á árásinni á þinghúsið fyrir að birta myndefni sem sýndi meðal annars flóttaleið hans frá skrifstofunni og flótta Mike Pence, þáverandi varaforseta sem mótmælendur sögðust vilja hengja.

Aðrir Repúblikanar hafa tekið undir þá gagnrýni og segja rannsóknarnefndina hafa sýnt mikið viðkvæmt myndefni.

Gagnrýni Repúblikana hefur einnig beinst að Alexöndru Pelosi, dóttur Nancy Pelosi, fyrrverandi þingforseta, sem birti myndefni sem hún tók upp þann 6. janúar 2021.

Sjá einnig: „Við verðum að klára athöfnina, annars vinna þau“

Samband McCarthys og Carlsons hefur ekki alltaf verið dans á rósum. Carlson hefur lengi verið gagnrýninn á McCarthy en dró þó í land með þá gagnrýni þegar sá síðarnefndi gerði atlögu að embætti þingforseta fyrr á þessu ári.

Carlson veitti McCarthy þá stuðning.