Telur tjónið nú þegar nema hundruð milljónum króna

Allir forsvarsmenn tæplega tvö þúsund fyrirtækja sem eru í Samtökum atvinnulífsins geta tekið þátt í leynilegri atkvæðagreiðslu um verkbann á félagsmenn Eflingar sem falla undir almennan kjarasamning eða veitinga-og gistihúsasamning SA og Eflingar. Atkvæðagreiðslunni lýkur í dag klukkan fjögur. 

„Þátttaka hefur verið mjög góð og við munum tilkynna um úrslitin annað hvort í kvöld eða fyrramálið. Ég vænti þess að félagsmenn SA munu samþykkja boðað verkbann,“ segir Halldór Benjamín Þorbergsson framkvæmdastjóri SA..

Halldór segir að nú sé gert ráð fyrir að verkbannið taki gildi 2. mars.

„Við munum útskýra nánar hvað felst í því  þegar boðunin liggur fyrir,“ segir Halldór.

Við áttum okkur á okkar ábyrgð en það þarf tvo til

Settur ríkissáttasemjari hefur gefið út að hann ætli fljótlega að taka ákvörðun um hvort hann vísi úrskurði Landsréttar um að hafna kröfu sáttasemjara um afhendingu kjörskrár til hæstaréttar. Vinnumálaráðherra sagði í fréttum í gær eðlilegt að fá skorið úr réttaróvissu varðandi það atriði.

 Halldór á fund með settum ríkissáttasemjara í dag.

„Ég geri ráð fyrir að hitta hann síðar í dag og fara yfir stöðu mála hjá okkur. Ég geri ráð fyrir að þetta verði einvörðungu samtal milli mín og ríkissáttasemjara,“ segir Halldór. 

Aðspurður um skilaboð stjórnvalda frá því í gær um ábyrgð deiluaðila að ræða saman og reyna að ná samningum svarar Halldór:

„Ég og SA áttum við okkur á þeirri miklu ábyrgð sem við berum í þessari stöðu. Hins vegar þarf tvo til að ná samningum,“ segir hann. 

Tjón hlaupi nú þegar á hundruðum milljóna króna

Hótelstarfsmenn og bílstjórar í Eflingu hófum verkfallsaðgerðir að nýju á miðnætti á sunnudag. 

Elías Bj. Gíslason settur ferðamálastjóri segir að nú þegar hafi um sjö hótelum verið lokað eða séu að loka á höfuðborgarsvæðinu. Það samsvari um um fimmtán hundruð herbergjum eða ríflega einum fjórða af öllum hótelherbergjum á svæðinu.

„Hótelin eru búin að vera mjög dugleg að koma skilaboðum til sinna gesta. Eftir því sem mér skilst hafa þau náð að endurbóka gestina á aðra staði,“ segir hann.

Auðvelt hafi verið að ná til hópa en mun flóknara sé að ná til einstaklinga sem bóki gegnum þriðja aðila.

„Það eru því miður einhver hundruð sem hafa ekki fengið skilaboð, því miður,“ segir hann.

Ferðamálastofa hafi sett upp neyðarnúmer fyrir þessa einstaklinga sem sé aðgengilegt á vef stofnunarinnar. Hann segir verkfallið nú þegar búið að valda miklu tjóni.

„Við erum alveg örugglega ekki tala um tug milljónir við erum örugglega að tala um nokkur hundruð milljónir sem við erum komin í nú þegar því stórir hópar eru nú þegar búnir að afpanta, segir Elías.