Rýnt í stöðuna í Úkraínu: Geta ekki bæði varið Bakhmut og undirbúið gagnárásir

Varnarmálaráðherrar Atlantshafsbandalagsins og annarra bakhjarla Úkraínu funda í Brussel í dag. Þar verður meðal annars talað um hvernig koma megi frekari skotfærum til Úkraínumanna, sem sagðir eru eiga við skort að stríða. Bæði vantar þá skotfæri fyrir stórskotalið frá Vesturlöndum og skriðdreka frá tímum Sovétríkjanna.

Jens Stoltenberg, framkvæmdastjóri Atlantshafsbandalagsins, sagði í gær að Úkraínumenn væru að nota fleiri sprengikúlur en bakhjarlar þeirra hafa tök á að framleiða. Ráðamenn í Bandaríkjunum hafa þegar tilkynnt fjárfestingar í aukinni framleiðslugetu en það hefur reynst Evrópuríkjum erfiðara.

Dræm framleiðslugeta, skortur á sérhæfðu starfsfólki, vandamál með birgðakeðjur, hár fjármagnskostnaður og regluverk Evrópusambandsins er sagt hafa komið niður á getu Evrópu til að halda í við skotaflæðið til Úkraínu,

Sjá einnig: Evrópa í basli með skotfærabirgðir og framleiðslu

Stoltenberg sagði að Rússar og bakhjarlar Úkraínu væru í raun í framleiðslukapphlaupi. Rússar væru að reyna að sækja fram víða í Úkraínu og það hefði leitt til fordæmalausrar sprengikúlunotkunar Úkraínumanna á undanförnum vikum. Því væri gífurlega mikilvægt að koma frekari skotfærabirgðum, eldsneyti, varahlutum og öðrum nauðsynjum til Úkraínu sem fyrst.

Samkvæmt frétt FT sagði Stoltenberg að mikið rædd stórsókn Rússa væri hafin í Úkraínu. Þúsundir hermanna væru að sækja fram og Úkraínumenn þurfi að fá birgðir svo Rússar nái ekki frumkvæðinu í átökunum. Auka þyrfti skotfæraframleiðslu og það hratt.

Áætlað er að Úkraínumenn hafi verið að skjóta um fimm þúsund sprengikúlum á dag að undanförnu. Rússar eru sagðir skjóta um fjórum sinnum fleiri skotum á degi hverjum.

Hafa náð takmörkuðum árangri hingað til

Víglínurnar í Úkraínu hafa lítið breyst en Úkraínumenn eru undir miklum þrýstingi þar sem Rússar eru sagðir gera umfangsmiklar árásir víða í Dónetsk og Lúhansk. Enn sem komið er virðast þessar árásir hafa skilað takmörkuðum árangri. Þó Rússar hafi sótt lítillega fram á nokkrum stöðum hefur þeim ekki tekist að brjóta sér leið í gegnum varnir Úkraínumanna.

Útlit er þó fyrir að bærinn Bakhmut muni falla í hendur Rússa á næstunni. Rússar hafa gert atlögur að bænum í marga mánuði en eru nú nærri því að umkringja hann.

Þurfa líklega að hörfa frá Bakhmut

Úkraínumenn hafa byggt upp nýjar varnarlínur, austur af Bakhmut, og líklegt er að fall bæjarins myndi ekki hafa mikil áhrif á innrásarstríð Rússa fyrir utan það að reynast vel í áróðri ríkisins. Úkraínumenn segjast hafa dregið verulega úr styrk hersveita Rússa við Bakhmut með því að verja bæinn svo lengi og með því að þvinga Rússa til að sækja fram gegn víggirtum vörnum Úkraínumanna.

Sjá einnig: Kokkur Pútíns segir hvert hús í Bakhmut vera virki

Varnirnar hafa einnig kostað Úkraínumenn mörg líf.

Í frétt Wall Street Journal segir að forsvarsmenn úkraínska hersins standi frammi fyrir þeirri ákvörðun að skipa hermönnum að hörfa frá Bakhmut til að koma í veg fyrir að þeir verði umkringdir og til að verja líf þeirra.

Þetta myndband sýnir nýlega bardaga í Bakhmut.

Rússar eru einnig sagðir hafa orðið fyrir gífurlegu mannfalli við Vuhledar, suður af Bakhmut. Myndefni sem birt hefur verið á samfélagsmiðlum hefur sýnt Rússa sækja fram á skrið- og bryndrekum en verða fyrir miklu mannfalli. Rússneskir herbloggarar hafa gagnrýnt framferði rússneska hersins við Vuhledar harðlega og kallað eftir því að forsvarsmenn hersins verði dregnir til ábyrgðar vegna mannfallsins þar.

Sjá einnig: Segja Rússa hafa misst heilt stórfylki við Vuhledar

Grófa mynd af stöðu mála í Úkraínu má sjá á meðfylgjandi kortum frá bandarísku hugveitunni Institute for the study of war frá því í gærkvöldi.

Næstu mánuðir mikilvægir

Ráðamenn í Bandaríkjunum hafa varað Úkraínumenn við því að mikilvægar tímar séu í vændum og að þeir þurfi að taka mikilvægar og mögulega afdrifaríkar ákvarðanir. Samkvæmt frétt Washington Post hefur þrýstingur á Úkraínumenn aukist varðandi það að þeir verði að ná árangri á komandi mánuðum.

Greinendur og skipuleggjendur Bandaríkjahers hafa sagt Úkraínumönnum, samkvæmt frétt WP, að það sé óraunhæft að Úkraínumenn geti bæði varið Bakhmut og gert gagnárásir í vor með því markmiði að leggja undir sig landsvæði sem talið er mikilvægara en Bakhmut.

Heimildarmenn miðilsins segja að Vólódímír Selenskí, forseti Úkraínu, hafi gefið Bakhmut táknræna stöðu og að hann telji að það myndi skaða baráttuanda Úkraínumanna að tapa bænum.

Bandaríkjamenn segja að haldi Úkraínumenn áfram að leyfa Rússum að stýra átökunum í Úkraínu, með því að senda hermenn til að verjast öllum sóknum Rússa muni það koma niður á vörnum þeirra. Þeir eigi þess í stað að leggja áherslu á gagnárásir í vor með vopnum frá Vesturlöndum og hermönnum sem hafa fengið þjálfun í Vesturlöndum.

Eiga von á tugum skriðdreka

Verið er að þjálfa úkraínska hermenn á vestræna skriðdreka. Í Bretlandi er hópur hermanna að læra á Challenger 2 skriðdreka og þar að auki eru úkraínskir hermenn í Póllandi að læra á Leopard skriðdreka frá Þýskalandi.

Þó nokkur ríki hafa tilkynnt að til standi að útvega Úkraínumönnum nokkra tugi Leopard skriðdreka á næstu mánuðum.

Ríkisstjórn Noregs tilkynnti í dag að hún muni senda átta Leopard 2 skriðdreka til Úkraínu og fjögur stuðningsfarartæki. Þá yrðu fjármunir settir til hliðar fyrir varahluti og skotfæri fyrir skriðdrekanna.

Þá ætla Bandaríkjamenn að senda Úkraínumönnum M1 Abrams skriðdreka en það mun taka lengri tíma. Bandaríkjamenn og Þjóðverjar eru einnig að senda mikinn fjölda bryndreka af gerðinni Bradley og Marder til Úkraínu.

Báðir bryndrekarnir eru meðal annars til í mismunandi útgáfum sem eru hannaðar til að flytja hermenn eða berjast og geta þeir verið notaðir til að granda rússneskum skrið- og bryndrekum. Fregnir hafa borist af því að Bradley bryndrekarnir séu komnir til Evrópu og á leið til Úkraínu.

Úkraínumenn hafa fengið mikinn fjölda skriðdreka sem þróaðir voru á tímum Sovétríkjanna frá öðrum ríkjum Austur-Evrópu, og Rússum. Þeir hafa þó frá upphafi innrásar Rússa beðið um vestræna skriðdreka og önnur vestræn vopn. Á blaði eru þessir skriðdrekar betri en þeir rússnesku. Þar að auki eru aðrar ástæður fyrir því að Úkraínumenn hafa viljað og þurfa vestræna skriðdreka.

Það sama á við með stórskotalið og annars konar vopnakerfi sem Úkraínumenn þurfa og munu þurfa frá Vesturlöndum. Stærstu ástæðurnar eru að skotfæri og varahlutir í skriðdreka frá tímum Sovétríkjanna eru ekki framleidd nema í Rússlandi.

Til lengri tíma munu Úkraínumenn þurfa alfarið að snúa sér að vestrænum vopnum.

Telja Úkraínumenn ekki geta náð Krímskaga

Ráðamenn í Úkraínu hafa sagt að þeir ætli sér að reka Rússa alfarið á brott frá Úkraínu og þar á meðal frá Krímskaga, sem Rússar hertóku og innlimuðu ólöglega árið 2014. Sérfræðingar Bandaríkjahers telja hins vegar að Úkraínumenn hafi ekki burði til að ná Krímskaga aftur af Rússum að svo stöddu. Samkvæmt heimildum WP hefur þetta mat verið kynnt bandarískum þingmönnum á undanförnum vikum.

Ráðgjafar Joe Biden, forseta Bandaríkjanna, segjast vilja hjálpa Úkraínumönnum að ná því svæði sem þeir geta á næstu mánuðum og svo í framhaldinu af því setjast við samningaborðið með Vladimír Pútín, forseta Rússlands.

Úkraínumenn hafa hins vegar sagt að þeir hafi litla trú á því að hægt sé að gera samkomulag við Pútín og að hann myndi eingöngu nýta mögulegt vopnahlé eða friðarsamkomulag til að byggja her sinn upp að nýja og ráðast aftur á Úkraínu.

Leyniþjónustur í Úkraínu og á Vesturlöndum áætla samkvæmt frétt Washington Post að rúmlega þrjú hundruð þúsund rússneskir hermenn séu í Úkraínu og að Rússar stefni á að fjölga þeim um einhver hundruð þúsund til viðbótar.