Skagastrákarnir byrja og Sverrir leikur sinn fyrsta landsleik í langan tíma

Sverrir Ingi Ingason er í byrjunarliðinu og leikur sinn fyrsta landsleik síðan gegn Liechtenstein 31. mars í fyrra. Við hlið hans í miðri vörninni er jafnaldri hans, Hörður Björgvin Magnússon. 

Nýkrýndur Svíþjóðarmeistari Valgeir Lunddal Friðriksson er hægri bakvörður og Davíð Kristján Ólafsson vinstri. Rúnar Alex Rúnarsson er í markinu.

Skagastrákarnir hjá FC Kaupmannahöfn, Ísak Bergmann Jóhannesson og Hákon Arnar Haraldsson, eru báðir í byrjunarliðinu. 

Ísak er á miðjunni ásamt Birki Bjarnasyni og Þóri Jóhanni Helgasyni. Hákon er líklega fremstur og þeir Jóhann Berg Guðmundsson og Jón Dagur Þorsteinsson sitt hvoru megin við hann.

Leikur Litáens og Íslands hefst klukkan 17:00 og verður í beinni textalýsingu á Vísi.