Frysta leigu­verð næstu þrjá mánuði

Fram kemur að leigan í desember, janúar og febrúar muni þannig haldast óbreytt frá nóvember 2022. Allir leigusamningar félagsins eru bundnir vísitölu neysluverðs til verðtryggingar.

„Tilgangur Brynju er að kaupa, eiga og reka íbúðarhúsnæði fyrir öryrkja sem leitast er við að leigja þeim gegn eins hóflegu gjaldi og kostur er.

Viðskiptavinir Brynju, eins og allir, þurfa að kljást við hækkandi verðbólgu og vexti. Mánaðarleg leiga hefur hækkað um 8,3% á árinu 2022 sem svarar til þess að búið sé að bæta 13. mánuðinum við árið.“

Verðbólga og hækkandi vextir bíta

Haft er eftir Guðbrandi Sigurðssyni, framkvæmdastjóra Brynju leigufélags, að verðbólga og hækkandi vextir setji þrýsting á alla í samfélaginu, en mest þó á þá sem hafi minnst á milli handanna.

„Brynja vill styðja við bakið á sínu fólki með því að gefa leigjendum sínum verðbólgufrí næstu þrjá mánuðina. Eitt mikilvægasta hagsmunamál Brynju og leigjenda félagsins er að viðhalda lágri verðbólgu og lágum vöxtum.“

Brynja á og rekur yfir 850 eignir víðsvegar um landið en þó aðallega á höfuðborgarsvæðinu, Akureyri, Akranesi, Selfossi og í Reykjanesbæ.