Stóð frammi fyrir því að loka eða fara alla leið

Þar er að finna fyrsta heildræna innileikvöllinn á Íslandi en einnig fer þar fram starfsemi Hreyfilands og Þorpsins, þar sem boðið er upp á fræðslu af öllum toga fyrir foreldra og börn.

Kaffihús og „saltkassi“

„Leikvöllurinn er hannaður fyrir núll til sex ára aldur en að sjálfsögðu eru systkini velkomin að koma, ef eldri systkini vilja koma inn en flest leikföngin eru hönnuð fyrir yngri en sex ára,“ segir Krisztina.

Í framtíðinni er stefnt að því að opna kaffihús í húsnæðinu. Aðeins eru búnar framkvæmdir á helmingi rýmisins sem er alls 1.200 fermetrar. Einnig er vonast til þess að geta sett upp skynörvunarherbergi og saltherbergi. 

„Saltherbergi í Ungverjalandi eru notuð sem meðferð fyrir börn með astma og fólk með öndunar erfiðleika. Það er forvörn fyrir bólgur í kinnholunum og eyrunum. Það er í rauninni forvörn við kvefi,“ segir Krisztina sem ólst upp í Ungverjalandi.

„Börnin eru að leika bara alveg eins og í sandkassa, nema með salt. Svo kemur gufan sem fer inn í öndunarkerfið og hreinsar það.“ Hún segir þessa náttúrulegu aðferð vera notaða í leikskólum erlendis.

Hugmyndin endaði ofan í skúffu

Líkt og áður sagði kviknaði hugmyndin upphaflega árið 2007, út frá starfsemi Hreyfilands, sem Krisztina rak á þeim tíma. Hún endaði þó ofan í skúffu og aldrei gafst tími til þess að framkvæma hana. 

Það var ekki fyrr en dag einn þegar Krisztina stóð á hálfgerðum krossgötum í lífinu að hún tók á skarið og lét drauminn rætast.

„Það kom að því að ákveða hvort að ég ætlaði að loka fyrirtækinu mínu eða bæta stórlega við það. Ég komst á þann tímapunkt að taka rykið af gamla verkefninu og gera Fjölskylduland að raunveruleika,“ segir hún.

Stofnuðu hópfjármögnun

Til þess að byrja með stóð hún ein að verkefninu en með tímanum náði hún að safna fólki í ringum sig sem var með sömu sýn og hún fyrir verkefnið. Saman settu þau af stað hópfjármögnun hjá Karolina Fund. Þau settu sér markmið að safna fimm milljónum króna á þrjátíu dögum.

„Þegar við vorum búin að setja okkur markmið um það hvað við vildum safna þá var okkur sagt að það væri allt of há upphæð og það væri ekki hægt að safna því á svona stuttum tíma. Ég sagði: Við erum ekki með tíma til þess að safna í sextíu daga þannig við prófum bara og í versta falli gengur það ekki,“ segir hún og hlær.

Slógu met 

Það sem gerðist næst var ótrúlegt að sögn Krisztinar en búið var að safna upphæðinni á aðeins tuttugu og sex dögum. „Og þetta var held ég met á Karolina Fund á svona stuttum tíma, sem sýnir hversu mikil þörf er fyrir svona þjónustu á Íslandi,“ segir hún.

Hugmyndafræði Fjölskyldulands

Aðspurð hvað sé í boði fyrir gesti starfseminnar segir Krisztina: „Fyrst og fremst leikur og við viljum hvetja foreldra til þess að leika með börnunum sínum. Það er aðal conceptið, þetta er ekki barnapössun heldur koma foreldrar með börnin sín saman og við erum að leiða þau í því hvernig er sniðugt að leika og nota öll okkar leikföng sem eru í boði.“

Þorpið tengslasetur

Þorpið tengslasetur er vettvangur sem styður við tengslamyndun fjölskyldna í gegnum ýmiskonar viðburði, námskeið og einstaklingsþjónustu sem er bæði í raun- og netheimum. Þorpið er fyrir öll börn fyrstu fimm ár lífsins og fjölskyldur þeirra. Það voru þær Alda Pálsdóttir og Sólveig Kristín Björgólfsdóttir sem stofnuðu það.

„Okkur var farið að líða eins og utangarðs í okkar eigin samfélagi, þar sem áherslan er á árangur og afköst fram yfir líðan og velferð einstaklinganna. Leikskólar eru yfirfullir og undirmannaðir, foreldrar eru látnir standa einir í fæðingarorlofi með óskýr svör um hvenær og hvort þeir fái leikskólapláss. 

Á sama tíma og þeir fá þau skilaboð um að aðrir séu betur til þess fallnir að annast börn þeirra fyrstu viðkvæmustu árin. Þorpið er sprottið sem svar við þessum veruleika,“ segir í lýsingunni á verkefninu.

Námskeið fyrir feður

Fjölskyldu- og hjónabandsráðgjafinn Ólafur Grétar Gunnarsson er einn þeirra aðila sem er með námskeið á vegum Þorpsins. Námskeiðið sem hann er með ber heitið Feður fyrir feður. „Ég er að kenna þeim hvernig þeir geta annast sjálfan sig vel. Þegar þú verður foreldri þarftu að gefa í að annast sjálfan þig vel. 

Það að leyfa þér að vaka lengi fram eftir, kannski tengt tölvuleikjum. Hanga helgar yfir fótboltaleikjum, verja tímanum þínum án þess að tala við maka. Það er ekki góð hugmynd,“ segir hann meðal annars um námskeiðið.

„Það sem ég segi þeim líka, sem við þurfum að tala meira um. Þegar að sambönd ganga ekki vel þá eru sterkar vísbendingar um það að það eru svona takmarkanir hans sem hafa meira að gera með það að sambandið gangi ekki upp. Það er meira hann en hún. Það þarf bara virkilega að skoða hvernig þeir bregðast við boðum frá henni.“

Kennir mökum að annast sig til þess að annast aðra

„Hvernig þeir halda á eigin líðan þegar þeir koma inn á heimilið eftir að hafa verið frá því að gera smá vörutalningu, hvað er ég að koma með heim? Því elskan mín sem er búin að vera með barnið, í fæðingarorlofi hún er búin að vera mögulega félagslega einangruð í allan dag þannig að ég vil gefa henni pláss í að tjá sig. Fyrsta fullorðna manneskjan sem hún er að hitta.

Þannig að annast sjálfan sig, gefa vel í annast sjálfan sig. Svo þurfa þeir að hugsa um hvernig get ég annast hana. Sér í lagi þar til barnið er orðið tveggja ara gamalt,“ segir Ólafur. „Foreldrið sem er að bera barnið það þarf að fá meiri umönnun frá maka heldur en makinn sem er að bera barnið minna. Það er er svona leið til að jafna það út.“