Pottaplöntufólk ekki leiðinlegt

Allt í blóma inniheldur allt sem blómaræktendur þurfa að vita og er þetta fyrsta bók Hafsteins. Hann hefur þó í drjúgt fjóra áratugi frætt landsmenn um umönnun pottaplantna og eftir hann liggur fjöldi pistla um blómarækt og garðyrkju, auk og úrvarps- og sjónvarpsþátta.

„Þetta er bara hin bærilegasta bók, ég tek á öllu því helsta. Ég hef ekki fengið neikvæðar umsagnir enn svo þetta vonandi virkar, hún á að vera ‚idjót-prúúf‘,“ segir Hafsteinn en í bókinni tekur hann saman helstu tegundir sem hann hefur kynnst á heimilum og blómamarkaði síðustu áratugi og svarar algengustu spurningum. Hversu mikið á að vökva? Hvaða birta hentar plöntunni og hvar ætti hún að standa? Hvenær á að umpotta og hvaða mold er best?

Stofublóm njóta vinsælda sem aldrei fyrr og Facebookhópurinn Stofublóm Inniblóm Pottablóm, þar sem Hafsteinn gefur góð ráð, telur um 40 þúsund fylgjendur.

„Ég var lokkaður þangað inn og sinni þeim hóp eftir getu en það má segja að áhugi á pottablómum gangi yfir í bylgjum. Í covid fór fólk að rækta bæði matjurtir og garðana sína og pottablóm.

Nú gengur yfir tískubylgja af plöntum sem eru skyldar Monsterunni og svo á það eftir að breytast. Pelargóníur, fúksíur og havaírósir voru algengar hér á árum áður þegar einfalt gler var algengara í gluggum og auðveldara var að halda blóm sem fóru í vetrardvala,“ útskýrir Hafsteinn. Tvöfalt gler og gólfhiti skapi ekki endilega bestu skilyrðin. „Það tekur á plönturnar þegar breytingarnar eru minni og sami hiti inni hjá okkur allan ársins hring hvort sem það er sólríkt sumar eða dimmur vetur,“ segir hann. Í grunninn sé þó fátt sem plöntum mislíkar nema helst ofvökvun, of mikill áburður, kuldi og sterk sól og í bókinn er farið vandlega yfir þetta allt saman.

Hafsteinn segir bókina hálfgerða plöntusálfræði og eru ekki plöntur góðar fyrir sálarlíf okkar líka?

„Ég hef ekki gert rannsóknir á því en eflaust er fólk ekki eins stressað þegar það sinnir blómum. Það er gott að hafa pottaplöntur hjá sér, maður getur sagt þeim ýmislegt og þær kjafta ekki frá,“ segir hann sposkur.