Gummi Ben biðlar til Barkar: „Værir þú til í að leyfa okkur það?“

Arnari Grétarssyni var sagt upp störfum hjá KA þann 23. september síðastliðinn og Hallgrímur Jónasson ráðinn í hans stað. Uppsögnin kom á óvart þar sem KA hefur náð góðum árangri undir hans stjórn í sumar.

Samningsmál hans hafa hins vegar verið til umræðu, þar sem Arnar sjálfur hefur farið í viðtöl og sagst heldur ósáttur við að hafa ekki fengið boð um nýjan samning. Hann hefur mikið verið orðaður við þjálfarastöðuna hjá Val og KA ákvað í stað þess að bjóða honum nýjan samning, að segja honum upp fyrir úrslitakeppnina í Bestu deildinni og ráða aðstoðarmann hans Hallgrím Jónasson sem aðalþjálfara liðsins.

„Fyrir mér er eins og KA hafi bara gefist upp á þessu, nenni ekki að hlusta á þetta,“ segir þáttastjórnandinn Guðmundur Benediktsson í Stúkunni á Stöð 2 Sport í gærkvöld.

Arnar staðið sig frábærlega

Lárus Orri Sigurðsson þekkir vel til fyrir norðan og segir Arnar hafa gert frábæra hluti hjá KA. Ekki aðeins þegar litið er til árangurs innan vallar, heldur hafi hann breytt hlutum til hins betra hjá félaginu í heild.

„Hann er búinn að standa sig alveg frábærlega fyrir norðan,“ segir Lárus Orri. „Hann er búinn að gjörbreyta mörgum hlutum og skila KA-mönnum í fjórða sæti í fyrra og í Evrópusæti núna. Hann er búinn að bæta marga leikmenn þarna og vera ötull stuðningsmaður þess að bæta aðstöðuna og það er mjög hjálplegt fyrir KA að hafa hans rödd á bakvið það,“

„Hann er búinn að ná alveg gríðarlega miklu út úr mörgum leikmönnum svo það er alveg sama hvernig þú lítur á þetta, hans starf fyrir norðan er mjög flott,“

„Aftur á móti, hvernig þetta endaði er mjög súrt. Mér finnst þetta mjög lélegt hvernig þetta endaði,“ segir Lárus Orri.

Hvernig myndi Arnar bregðast við?

„Maður skilur KA-menn alveg vel að hafa tekið þessa ákvörðun,“ segir Albert Brynjar sem veltir því upp hvernig Arnar sjálfur hefði brugðist við ef leikmaður liðs hans myndi tjá sig með samskonar hætti og Arnar sjálfur gerði.

„Eftir að hann gaf út að hann hefði hugsanlega áhuga á að færa sig um set, þá hafi verið einhver pirringur að KA hafi ekki brugðist við með því að bjóða honum samning,“

„Ef að við snúum þessu við og Arnar Grétars væri með leikmann sem myndi gefa svona út. Að hann hefði áhuga á að færa sig og væri að horfa hýru auga á önnur lið. Arnar Grétars myndi bara segja við stjórnina að hann vildi ekki hafa þennan gæja í hópnum,“

„Hann myndi vilja losa sig við hann. Þannig að maður skilur alveg stjórn KA, einhvers staðar þarf stoltið að vera,“

„Það er bara sorglegt hvernig þetta endaði,“ segir Guðmundur og Lárus Orri tekur undir: „Þetta er bara algjör synd, vegna þess að þetta er búið að vera mjög gott fyrir KA og líka fyrir Arnar,“

Þjálfarafíaskó í Val

Ólafur Jóhannesson er þjálfari Vals en ljóst þykir að hann sé á förum eftir tímabilið. Hann tók við Val í annað sinn á miðju tímabili, eftir að hafa verið sagt upp hjá liðinu 2019. Hann tók við af Heimi Guðjónssyni sem hafði tekið við af Ólafi á sínum tíma.

Ljóst þykir að Arnar taki við Val en Arnar hefur staðfest að hann sé með samkomulag við annað félag eftir að greint var frá uppsögn hans hjá KA.

„Það vita allir hvaða félag það er og það setur þann klúbb líka í óþægilega stöðu og þá þjálfara sem eru þar,“ segir Albert. Guðmundur vitnaði þá í frétt frá Fótbolti.net þar sem segir að Ólafi Jóhannessyni og Helga Sigurðssyni, þjálfurum Vals, hafi verið tilkynnt að þeir verði ekki áfram að leiktíðinni lokinni.

„Þarna erum við komnir inn í annað mál, sem er álíka klaufalegt og að öllu leyti verra - það er þjálfarafíaskóið í kringum Val. Ég veit ekki hvort við viljum vera að fara í það mál allt saman núna, en það þarf sérþátt í allt það mál,“ segir Lárus Orri.

„Það er bara skelfilegt að sjá hvernig er búið að fara með tímabilið hjá okkar ríkasta félagi,“ bætti hann við.

Heimildamynd, takk!

Guðmundur óskaði þá eftir því í beinni útsendingu að fá að gera heimildamynd á næsta ári um samstarf Edvards Barkar Edvardssonar, formanns knattspyrnudeildar Vals, og Arnars Grétarssonar í þjálfarastarfinu.

„Ég ætla bara að setja núna í loftið, og gera þetta í beinni útsendingu: Kæri Börkur Edvardsson, værir þú til í að leyfa okkur að gera heimildamynd um það þegar þú og Arnar Grétarsson vinnið saman á næsta tímabili? Ég væri til í að sjá það,“ segir Guðmundur.

Umræðuna má sjá í heild sinni í spilaranum að ofan.