Er bæði hægri og vinstri hönd Steina

Þorsteinn er nefnilega að stýra liði á sínu fyrsta stórmóti en Ásmundur var aðstoðarþjálfari Freys Alexanderssonar á Evrópumótinu í Hollandi fyrir fimm árum síðan.

Ásmundur var aftur til í slaginn þegar Þorsteinn leitaði til hans um að verða aðstoðarmaður hans. Ásmundur sér ekki eftir því í dag.

„Það er geðveikt gaman og þetta er ótrúlega skemmtilegur hópur. Leikmennirnir eru fagmenn fram í fingurgóma og allt starfsliðið okkar líka. Það er ótrúlega góður andi hérna líka,“ sagði Ásmundur.

„Það er ótrúlega gott að vera hérna og við erum búin að leggja gríðarlega áherslu á að, bæði starfsfólk og okkar teymi, að passa vel upp á leikmenn og passa vel upp á starfslið. Að það sé gott umhverfi og það sé bara gott og gaman að vera hérna,“ sagði Ásmundur en í hverju liggur hans starf?

„Ég er hægri og vinstri hönd Steina í öllu sem hann vill og segir mér að gera. Það er kannski það helsta en við vinnum bara mikið saman þjálfarateymið í öllu sem við erum að gera. Það er ekkert sérstakt hlutverk sem maður sér um eingöngu. Við tökum að okkur alls konar hatta og hlutverk í öllu þessu,“ sagði Ásmundur.

„Það er líka það að hafa verið á þessu móti áður fyrir nokkrum árum það er sú reynsla sem maður er að koma með inn í þetta umhverfi,“ sagði Ásmundur.

Fyrir leikinn var það hann sem kallaði byrjunarliðið saman rétt áður en þær fóru aftur inn og reyndi að koma mikilvægum skilaboðum til þeirra.

„Við gerum þetta alltaf. Við erum þá að reyna að fara með einhver góð orð inn í hópinn og ítreka það sem við ætluðum að gera. Líka að ná andanum aðeins og njóta til að reyna að gera það sem við ætlum að gera eins vel og við getum,“ sagði Ásmundur.