Segja ólíklegt að ríkisstjórnin geti leitt nauðsynlega orkuöflun

Þetta kemur fram í yfirlýsingu frá þeim Þorgerði Katrínu Gunnarsdóttur og Daða má Kristóferssyni, formanni og varaformanni Viðreisnar.

Vísa þau til þess að samkvæmt grænni skýrslu ríkisstjórnarinnar frá því í mars þurfi að auka orkuframleiðslu um hundrað megavött á hverju árin næstu tvo áratugina, standi til að ná áðurnefndu markmiði ásamt öðrum um hagvöxt með grænni iðnbyltingu.

Þorgerður og Daði sendu Katrínu Jakobsdóttur, forsætisráðherra, bréf fyrr í vikunni og lögðu til að ráðherrann beitti sér fyrir skipun spretthóps til að undirbúa frumvarp til laga um auðlindagjald vegna vindorkuvera sem hægt væri að afgreiða á Alþingi í haust.

Í bréfi þeirra til forsætisráðherra vísuðu þau til ræðu Katrínar sem hún flutti þann 17. júní en þar sagði Katrín þörf á að marka ramma utan um það hvernig arðurinn af vindorku rynni til samfélagsins. Þorgerður og Daði sögðust telja breiða sátt um slíka auðlindagjaldtöku og mikilvægt væri að vinna við lagafrumvarp um það kæmi ekki niður á öðrum mikilvægum ákvörðunum, sem þegar hafi dregist of lengi.

Katrín svaraði bréfinu en Þorgerður og Daði eru ekki sátt við svarið og segja það valda verulegum vonbrigðum.

„Nauðsynlegt er að umhverfis,-orku og loftslagsráðherra geri nánari grein fyrir orkuöflunaráformum með tímasettri áætlun um það hvernig afla eigi orku vegna orkuskipta og grænna markmiða í atvinnuuppbyggingu þannig að tryggja megi nægjanlegan hagvöxt til þess að unnt verði að verja velferðarkerfið og leysa skuldavanda ríkissjóðs,“ segir í áðurnefndri yfirlýsingu þeirra.

Tveir starfshópar myndaðir

Í svari Katrínar segir að umhverfis-, orku og loftslagsráðherra hefði tilkynnt nýverið að búið væri að ákveða að skipa starfshóp til að gera tillögur um sérstök lög um nýtingu vindorku og hvernig megi ná markmiðum ríkisstjórnarinnar varðandi það að leggja áherslu á að vindorkuver byggist á afmörkuðum svæðum nærri tengivirkjum og lágmarka umhverfisáhrif.

Mikilvægt sé að breið sátt ríki um uppbyggingu vindorkuvera og að tillit sé tekið til sjónrænna áhrifa, dýralífs og náttúru.

Þessi starfshópur eigi einnig að finna leiðir til að leysa úr álitaefnum í löggjöf um vindorku. Þau álitaefni snúa meðal annars að skipulags- og leyfisveitingarferli vindorkuverka á viðkvæmum svæðum, hvernig ná eigi sem breiðastri sátt um vindorkuver, mögulega forgangsröðun virkjanarkosta og mögulegri gjaldtöku.

Starfshópurinn á að vinna náið með Sambandi íslenskra sveitarfélaga og eiga í samráði við hagaðila, ráðuneyti og stofnanir sem við á.

Katrín vísaði einnig til þess að umhverfis-, orku- og loftslagsráðherra hefði einnig tilkynnt að stofna ætti annan starfshóp sem ætti að vinna samantekt um nýtingu vinds á hafi í lögsögu Íslands. Nýta eigi þá samantekt til undirbúnings stefnumörkunar stjórnvalda sem lið í gerð uppfærðrar orkuskiptaætlunar.