Viðskipti innlent

Strandveiðisjómenn með 300 þúsund krónur á dag fá meiri kvóta frá Svandísi

Kristján Már Unnarsson skrifar
Frá höfninni á Arnarstapa á Snæfellsnesi.
Frá höfninni á Arnarstapa á Snæfellsnesi. Skjáskot/Stöð 2

Svandís Svavarsdóttir, ráðherra sjávarútvegsmála, úthlutaði strandveiðisjómönnum 430 milljóna króna verðmætum í dag með því að auka þorskkvóta sumarsins um nærri ellefu hundruð tonn. Viðbótin dugar þó vart nema til að framlengja strandveiðarnar út þennan mánuð.

Einhverjir myndu kalla strandveiðisjómennina hátekjumenn, svo vel hefur gengið á veiðunum í sumar. Meðalafli í hverjum róðri þetta sumarið nemur 750 kílóum, samkvæmt nýjustu tölum Fiskistofu, og miðað við 400 króna meðalverð fyrir kílóið af þorski gerir það 300 þúsund króna tekjur á dag.

Tólf veiðidagar hafa því gefið 3,6 milljónir króna í brúttótekjur á hvern bát að jafnaði á mánuði. Og þá eru ótaldar tekjur fyrir annan afla, en ufsinn sérstaklega hefur verið að gefa umtalsverðar aukatekjur.

Strandveiðisjómaður á bryggjunni á Bakkafirði.Arnar Halldórsson

En brátt er veislan búin, það hefur stefnt í að heildarkvótinn klárist upp úr 20. júlí, sem þýddi að 700 strandveiðibátar þyrftu þá að hætta veiðum. Sjómenn norðaustan- og austanlands telja sig með slíku bera skarðan hlut frá borði, þar sem bestan veiðin hjá þeim sé síðsumars.

Með loforð Vinstri grænna á bakinu um að efla strandveiðar bætti Svandís Svavarsdóttir í dag 1.074 tonnum af þorski í strandveiðipottinn. Ef því er deilt jafnt á alla báta koma 620 þúsund króna verðmæti í hlut hvers. Hjá Landssambandi smábátaeigenda áætlar Örn Pálsson framkvæmdastjóri að viðbótin dugi í fjóra til fimm daga í viðbót og telur að strandveiðarnar gætu kannski enst út mánuðinn.

Strandveiðifélag Íslands sendi frá sér tilkynningu í dag þar sem segir að til að tryggja veiðar í 48 daga á hvern bát í ár og sómasamleg lok vertíðar 31. ágúst þyrfti um það bil 3.000 tonn til viðbótar í strandveiðikvóta.

Hér má sjá frétt Stöðvar 2:

Sjávarútvegur Byggðamál Ríkisstjórn Katrínar Jakobsdóttur

Tengdar fréttir

Mótmæla áformum Svandísar um svæðaskiptingu

Strandveiðifélag Íslands mótmæli harðlega þeirri ætlun Svandísar Svavarsdóttur, matvælaráðherra, að setja aftur á svæðakerfi í strandveiði. Félagið, sem stofnað var í mars, segir að ekki hafi fengist fundur með ráðherranum vegna anna en fundað hafi verið með aðstoðarmanni hennar og sérfræðingum ráðuneytisins um núverandi vertíð.

Segja óboðlegt fyrir Norður- og Austurland ef strandveiðar stöðvast í næsta mánuði

Formenn þriggja samtaka smábátaeigenda á svæðum norðanlands og austan skora á Svandísi Svavarsdóttur matvælaráðherra að tryggja strandveiðar til ágústloka þannig að jafnræðis sé gætt milli landshluta. Núna sé ljóst að ætlaðar veiðiheimildir muni ekki duga til að tryggja strandveiðisjómönnum 48 veiðidaga í fulla fjóra mánuði, 12 daga í hverjum, eins og þeir segja að markmiðið hafi verið með síðustu breytingum á veiðikerfinu.

„Ég bara hika ekkert við að heimta meiri kvóta“

Strandveiðiflotinn mokveiðir nú sem aldrei fyrr og stefnir í að heildarpotturinn klárist fyrir lok næsta mánaðar. Formaður smábátaeigenda krefst þess að fá meiri kvóta til að koma í veg fyrir að veiðarnar stöðvist.

Tíu þúsund tonn af þorski í strand­veiði­pottinum í sumar

Svandís Svavarsdóttir matvælaráðherra hefur undirritað reglugerð um strandveiðar þorsks fyrir komandi strandveiðitímabil. Tíu þúsund tonn af þorski eru í pottinum á tímabilinu, sem hefst í maí og varir fram í ágúst. 



Mest lesið


Fleiri fréttir

Sjá meira


×

Mest lesið