Fjórir látnir og þrjátíu slasaðir eftir lestarslys í Suður-Þýskalandi

Fimmtán þeirra sem slösuðust þurftu að komast undir læknis hendur að sögn talsmanns lögreglu á svæðinu. Slysið varð norður af Garmisch-Partenkirchen í Bæjarlandi. Lögregla og saksóknari hafa hafið rannsókn á því hvað olli slysinu. 

Ekki er búið að greina frá nöfnum þeirra sem fórust í slysinu eða hvort lestarstjórinn hafi verið meðal þeirra sem létust eða slösuðust. 

Talsmaður svæðisstjórnarinnar greindi frá því fyrr í dag að sextíu hafi slasast í slysinu en það reyndist ekki rétt. Samkvæmt fréttastofu Muenchener Merkur var fjöldi stúdenta um borð í lestinni. 

Mikill viðbúnaður er enn á svæðinu að sögn lögreglu og öll umferð um lestarteinana hefur verið stöðvuð. Samkvæmt frétt Reuters hefur farþegafjöldi lesta á svæðinu aukist mikið síðan 1. júní þegar ódýrir lestarmiðar, sem leyfa fólki að ferðast um allt Þýskaland, voru settir á sölu.