Kynsegin á Smitten

„Það hefur verið draumurinn okkar frá upphafi að Smitten geti hjálpað öllum að finna ástina, skyndikynni og allt þar á milli. Við vildum nálgast málið af virðingu og af samkeppninni að dæma, þá er ekki verið að leysa þetta mál vel. Sem dæmi um lausn hjá öðrum stefnumótarforritum þá getur kynsegin notandi sagst vera kynsegin en þarf svo að velja hvort prófíllinn eigi að birtast sem karl eða kona,” segir Ásgeir Vísir, hönnuður Smitten.

Fjöldi fólks hafði bent Samtökunum ‘78 á að betur mætti fara á hinu alíslenska stefnumóta appi Smitten en úr varð að Daníel E. Arnarson, framkvæmdastjóri Samtakanna ‘78 setti sig í samband við Smitten til þess að koma skilaboðunum áleiðis.

„Daníel hafði samband við okkur fyrir nokkrum vikum og ýtti í rauninni verkefninu af stað hjá okkur. Þetta var búið að vera heillengi á verkefnalistanum og loksins fengum við spark í rassinn til að klára þetta. Við fengum góða ráðgjöf hjá Daníel og Samtökunum ‘78 með útfærsluna,” segir Unnur Aldís forstöðumaður markaðsmála hjá Smitten.

Í dag geta notendur Smitten skráð sig inn sem kynsegin, karl eða kona. Einnig er lausn Smitten frábrugðin öðrum lausnum, en notendur geta valið um það að prófílinn birtist hjá öðrum notendum sem kynsegin en ekki einungis sem karl eða kona.

 Smitten er íslenskt stefnumóta-app sem var stofnað árið 2020 og hefur náð miklum vinsældum meðal einhleypra Íslendinga. Fyrr á árinu tók Smitten fyrstu skrefin á erlendum markaði, Danmörku, og í dag hafa tæplega 60.000 Danir nælt sér í appið. Ein af stærstu áskorununum sem notendur stefnumóta appa horfast í augu við er að hefja samtalið við aðra notendur. Á síðustu árum hefur Smitten náð að skapa sér sérstöðu á markaðnum með skemmtilegum ísbrjótum sem auðvelda fólki að hefja samtalið, sem dæmi, með leikjunum Guessary og Lie Detector. Notendur geta spilað leikina með því að giska á svörin hjá öðrum notendum en svörin nýtast svo til þess að hefja samtalið.

Smitten er frítt og aðgengilegt á App Store og Google Play: