Léttir að yfirvöld viðurkenni að brotið var á þeim

Fólk sem dvaldi á barnaheimili á Hjalteyri á áttunda áratug síðustu aldar steig fram í fyrra og sagði frá gríðarlegu ofbeldi gegn sér og öðrum börnum sem dvöldu þar.

Umfjöllunina má sjá að neðan.

Hver einstaklingurinn á fætur öðrum lýsti svo hrikalegu ofbeldi af hálfu hjóna sem ráku heimilið. Fólkið hafði í áranna rás ítrekað, án árangurs, reynt að ná eyrum yfirvalda til að fá heimilið rannsakað. 

Jón Gunnarsson dómsmálaráðherra ákvað í desember að skipa starfshóp til að afla upplýsinga um heimilið. Niðurstaðan lá fyrir í dag en hægt er að hlusta á allt viðtalið við hann hér.

„Það er mat þeirra sem eru búin að kafa vel ofan í málið á grundvelli þeirra heimilda sem nú þegar liggja fyrir að nægjanlegar upplýsingar liggi nú þegar fyrir til að fara í ferli til að greiða sanngirnisbætur til þessara einstaklinga,“ sagði Jón Gunnarsson eftir ríkisstjórnarfund í dag. 

Jón segir að stofnuð verði vistheimilisnefnd sem sé svipað fyrirkomulag og í öðrum tilvikum þar sem sanngirnisbætur hafa verið greiddar.

Klökkur yfir niðurstöðunni

Steinar Immanúel Sörensson sem dvaldi á Hjalteyri sem ungbarn ásamt þremur systkinum sínum segir þetta létti en tvö systkini hans sem voru þar um árabil létust fyrir aldur fram.  

„Ég er dálítið klökkur að heyra þetta því ég átti ekki beint von á þessu og í mínum huga er þetta fyrst og fremst viðurkenning fyrir þessari baráttu sem við erum búin að vera að standa fyrir. Það hefur verið erfiðast undanfarin ár að engin var til í að hlusta og þetta er því gríðarlegur léttir. Ég þakklátur að stjórnvöld hafi bara gengið í málið og leyfi okkur að koma okkar sjónarhorni á framfæri,“ segir Steinar. 

Steinar var líka á vöggustofu í Reykjavík ásamt Amelíu systur sinni. Reykjavíkurborg hafði óskað eftir lagaheimild frá ríki til að rannsaka þær eftir kröfu fólks sem hafði dvalið þar. 

Dómsmálaráðherra segir að lagaheimildin verði veitt á næsta þingi. 

Amalía Sörensdóttir segir þetta létti fyrir alla og viss uppreisn æru fyrir móður sína en vegna geðrænna veikinda hennar voru fjögur börn hennar vistuð á Hjalteyri, tvö á vöggustofu og eitt á Kumbaravogi.

„Hún barðist alla tíð fyrir því að fá að fá að vita eitthvað um börnin sín, að fá þau heim af þessum heimilum. Það eru t.d. til ótal bréf sem hún skrifaði vegna þessa sem eru til á Borgarskjalasafni. Hún lést árið 1999 og það væri gríðarlegur léttir fyrir hana að vita að þarna voru börnin hennar beitt ranglæti og að hún hefði getað veitt okkur mun betra heimili en við fengum á þessum stofnunum, þó að hún væri veik,“ segir Amalía en tekur fram að hún og Steinar hafi verið heppin að lokum því þau enduðu hjá mjög góðri fósturfjölskyldu eftir að hafa dvalið á vöggustofunni í Reykjavík.

Rannsókn á vegum Garðabæjar vegna starfa Hjalteyrarhjónanna með börnum þar er á lokametrunum samkvæmt upplýsingum fréttastofu.