Ráð­herra vill frið­mælast við leigu­bíl­stjóra

Eins og fram hefur komið í fréttum hefur verið þungt hljóð í leigubílsstjórum vegna nýs frumvarps sem gerbreytir öllum aðstæðum er varða leigubílaakstur. Í frumvarpinu er meðal annars gert ráð fyrir því að takmarkanir á heildarfjölda starfsleyfa, sem er um 600 talsins og að stöðvaskylda verði afnumin. 

Þetta þýðir að hver sem, að uppfylltum tilteknum skilyrðum, getur farið að keyra fólk gegn gjaldi. Í hinu nýja frumvarpi er litið til úrskurðar ESA, eftirlitsstofnunar EFTA, þar sem segir að núverandi regluverk á Íslandi er varðar starfsemi leigubíla sé ótækt. Það virki eins og í kvótakerfinu; ef leigubílsstjóri fellur frá erfist leyfið.

Fyrirhugaðar breytingar hafa hins vegar lagst afar illa í leigubílsstjóra svo vægt sé til orða tekið. Þeir hafa haldið því fram að þetta kippi fótum undan starfseminni.

Leigubílsstjórar yrðu sáttari með stöðvaskylduna inni

Frumvarpið hefur farið í gegnum umsagnarferli og bíður afgreiðslu umhverfis- og samgöngunefndar hvar Vilhjálmur Árnason er formaður.

Einar segir að Sigurður Ingi hafi spurt sig á téðum fundi hvort sátt næðist ef stöðvaskyldan yrði inni. Ráðherra vildi meina að lögin gerðu ráð fyrir því að svo gæti orðið. Og ef hann gæti gengið út frá því þá myndi hann tala fyrir því.

„Ég er eldri en tvævetur og veit að stjórnmálamenn segja oft það sem maður vill heyra,“ segir Einar. En hann segir að ef svo færi myndi það slá mjög á óánægju leigubílsstjóra; og hver vill eiga þá á fæti?

Einar segir að í frumvarpinu eins og það líti út í dag sé öll ábyrgð sett á bílsstjóra, að skrá hvert er farið og með hvern. Þetta sé mikilvægt öryggisatriði.

„Við vitum að Íslendingar eru ekki bestir í að skrá allt eftir sig. Stöðvarnar sjá um þetta í dag.“

Mikil vinna til að hafa laun uppúr akstrinum

Einar telur að þó stöðvaskylda verði eftir sem áður í lögum þá breyti það ekki tilgangi hinnar nýju lagasetningar. „Stöðin getur heitið Parki eða Uber eða hvað sem helst. Þá þyrfti að sækja um stöðvaleyfi eða rekstrarleyfi eins og það heitir þar; og þær úthluta túrum.“ 

Sigurður Ingi var að sögn Einars jákvæður gagnvart því að stöðvaskyldunni verði haldið inni og þá sé mikið unnið gagnvart viðskiptavinum og öryggismálum. Og hann segir að leigubílsstjórar gætu sætt sig betur við frumvarpið ef stöðvaskyldunni yrði haldið inni. Leigubílsstjórar hafi haft af því áhyggjur að engin takmörk séu fyrir því hversu margir geti lagt fyrir sig leigubílaakstur.

„Ég hef engar áhyggjur af því. Þegar menn komast að því hversu mikið þarf að vinna til að hafa laun uppúr þessu, þá hætta þeir strax.“