Eig­andi dýrasta stólsins fundinn og stóllinn fer á upp­boð

Stóllinn komst í fréttir í síðustu viku fyrir að vera dýrasta vara sem Góði hirðirinn hefur sett á sölu frá upp­hafi.

Hann er dönsk hönnunar­vara frá 6. ára­tugnum, eftir hönnuðinn Arne Vodd­er, og var settur á hálfa milljón króna í vef­verslun Góða hirðisins.

Ó­hætt er að segja að svo hátt verð á húsgagni í nytja­vöru­verslun hafi farið fyrir brjóstið á mörgum.

Missti konuna sína úr krabbameini

En fréttir af málinu urðu til þess að fyrr­verandi eig­andi stólsins gaf sig fram við Góða hirðinn.

„Hann vissi alveg að hann væri með verð­mæti í höndunum en vildi koma þeim í gott mál­efni og því kom hann til okkar, stóllinn,“ segir Ruth Einars­dóttir, rekstrar­­stjóri Góða hirðisins.

Eftir að eig­andinn fannst var á­kveðið að leyfa honum að velja mál­efni sem á­góðinn af sölu stólsins rynni til.

„Og þar sem hann missti konuna sína úr krabba­meini þá valdi hann Ljósið. Og allur á­góðinn af stólnum mun því renna til Ljóssins,“ segir Ruth.

Stóllinn fer því á upp­boð klukkan sjö í fyrra­málið. Og lág­marks­upp­hæðin er dá­lítið minni en upp­haf­lega verðið; fyrsta boð er upp á 95 þúsund krónur.

„Og það geta þá allir boðið í stólinn. Þetta verður sem sagt sett fram á Góða hirðis síðunni á Face­book. Og fólk gerir þá bara boð í kommenta­kerfinu.“

Uppboðið verður opið fram til næsta mánudags.

Líklega frumlegasta styrktarleiðin

Allt er þetta gert í sam­starfi við Ljósið sem er eðli­lega himin­lifandi með út­komuna í stóra stóla­málinu.

„Við höfðum nú bara séð hann hérna á fjöl­miðlum og það ver ekki fyrr en bara núna á dögunum sem að við fréttum af þessu skemmti­lega verk­efni og tókum því náttúru­lega bara fagnandi,“ segir Heiða Ei­ríks­dóttir hjá Ljósinu.

Ætli þetta sé ekki með svona frum­legri styrktar­leiðum sem þið hafið fengið?

„Jú ég man ekki til að við höfum fengið svona styrki hingað til án þess að ég þori að full­yrða það. Það er nú alveg ýmis­legt sem að kemur svona skemmti­legt á okkar borð,“ segir Heiða.

Reikningsupplýsingar Ljóssins verða einnig birtar við uppboðsfærsluna á morgun og geta þeir sem vilja leggja félaginu lið en hafa ekki áhuga á stólnum því lagt frjáls framlög inn á hann. 

Reikningurinn er: 0130-26-410420 og kennitala félagsins er: 590406-0740.