Martin stigahæstur í tapi gegn Barcelona

Valencia mætti Barcelona í undanúrslitum ofurbikarins í körfubolta á Spáni í kvöld. Ofurbikarinn er síðasti hluti undirbúningstímabilsins í spænska körfuboltanum áður en deildarkeppnin hefst.

Barcelona byrjuðu leikinn betur og leiddu eftir fyrsta leikhluta með ellefu stigum, 27-16. Katalóníumennirnir héldu síðan bara áfram uppteknum hætti og leiddu í hálfleik með sautján stigum, 45-28 og leikurinn eiginlega farinn frá Valencia.

Barcelona lokaði þessum sigri svo með nítján stigum, 87-68.

Martin Hermannsson var stigahæstur í liði Valencia með 11 stig ásamt Josep Puerto. Hjá Barcelona var Brandon Davies með 15 stig og Corey Higgins skoraði 13.

Næsti leikur Valencia er í deildinni á móti Baskonia laugardaginn 18. september.