Jónatan Ingi: Við stefnum klárlega ekki á að enda í 6. sæti

„Þetta var nokkurn vegin eins og við vildum. Við vitum að Leiknisliðið er gott lið og þeir hafa sýnt það í sumar, við töpuðum fyrir þeim í fyrri umferðinni og vissum að við yrðum að mæta þeim eins og menn. Komumst 1-0 í hálfleik og það var mjög gott. Svo bara keyrum við hægt og rólega yfir þá og náum að setja annað og þriðja markið sem voru svona mikilvægust til að klára leikinn, geggjað að klára þetta svona,“ sagði Jónatan Ingi.

Leiknisliðið hafði ákveðna yfirhönd í fyrri hálfleik og í upphafi síðari og ekkert stefndi í svona stóran sigur FH. Jónatan fannst Leiknisliðið meira með boltann en það var FH liðið sem sköpuðu færin.

„Jú þeir voru vissulega meira með boltann og við liggjum aðeins til baka en mér fannst þeir ekki skapa neitt rosalega mikið af færum. Við erum búnir að vera ekki alveg nógu góðir í sumar og við vildum bæta upp fyrir það. Liðsandinn, skerpa á nokkrum sendingum og vera aðeins þolinmóðari. Það vantaði oft eina auka sendingu til að plássið myndi opnast og við gerðum það mjög vel í síðari hálfleik sérstaklega,“ sagði Jónatan.

Líkt og fyrr segir þá átti Jónatan þrjár stoðsendingar í leik kvöldsins. Eitthvað sem stundum hefur verið rætt að vanti meira frá honum sem leikmanni. Jónatan var glaður með eigin frammistöðu en segir þó mikilvægast að vinna leikinn.

„Auðvitað gaman, við viljum bara vinna og það skiptir ekki öllu máli hver skorar. Lenny kannski vill skora mest. En jú mjög ánægjulegt og Matti og Pétur tóku bæði þessi færi vel og vítið auðvitað Lenny skorar alltaf úr þeim þannig bara geggjað,“ sagði Jónatan um stoðsendingarnar þrjár.

FH byrjaði leikinn með 17 ára Loga Hrafn á miðjunni og skiptu síðan inná mörgum ungum strákum sem voru að spila sína fyrstu, aðra eða þriðju leiki í Pepsi-Max deildinni. Jónatan er ánægður með ungu strákana og segir þá koma vel inn í hópinn og læri mikið.

„2.flokkurinn varð Íslandsmeistari í fyrri og það eru flottir árgangar að koma upp sem er geggjað. Logi Hrafn byrjar hérna inná og spilar þetta frábærlega. Óskar átti stoðsendingu á Oliver. Þeir hafa komið vel inn í þetta og læra vel af eldri og reyndari mönnum. Það er pínu aldursskipting í hópnum og við þurfum að fá þessa stráka inn. Þeir sýndu það í dag að þeir geta klárlega hjálpað okkur,“ sagði Jónatan um ungu leikmenn FH.

FH fara upp fyrir Leiknir í deildinni eftir sigur kvöldsins og sitja sem stendur í 6.sæti. FH á sex leiki eftir og Jónatan vill fara í þá alla til þess að vinna.

„Við förum í hvern einasta leik til að vinna hann, þegar þú ert í FH þá er ekkert annað boðlegt. Við skuldum sjálfum okkur það, stuðningsmönnum og öllum í kringum félagið að rífa okkur vel í gang. Við viljum vinna hvern einasta leik og það er nóg eftir. Mér finnst hún hafa spilast þannig þessi deild að allir geta unnið alla. Við stefnum klárlega ekki á það að enda í 6.sæti,“ sagði Jónatan að lokum um markmið FH.