„Ríkasti dómari heims“ fékk úrslitaleik EM

Kuipers, sem er 48 ára gamall, verður fyrsti Hollendingurinn sem fær að dæma úrslitaleik á EM. Hann hefur verið kallaður „ríkasti dómari heims“ eftir að hafa tekið þátt í stofnun matvöruverslanakeðju í heimalandinu. Samkvæmt Daily Mail var hann metinn á 11,5 milljónir punda árið 2016.

Þessi margreyndi dómari hefur áður dæmt leik Englands og Ítalíu á stórmóti en það var á heimsmeistaramótinu í Brasilíu árið 2014. Liðin mættust þá í riðlakeppninni og vann Ítalía 2-1 sigur, en bæði lið sátu eftir í riðlinum á meðan að Kosta Ríka og Úrúgvæ komust áfram.

Kuipers hefur dæmt þrjá leiki á EM til þessa. Hann dæmdi í 2-1 sigri Belgíu gegn Danmörku, 5-0 sigri Spánar gegn Slóvakíu og svo 2-1 sigri Danmerkur gegn Tékklandi í átta liða úrslitum.

Kuipers hefur áður dæmt úrslitaleiki fyrir UEFA. Hann dæmdi úrslitaleik Meistaradeildar Evrópu árið 2014, á milli Real Madrid og Atlético Madrid, og úrslitaleiki Evrópudeildarinnar árið 2013 og 2018.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.