Segir skrifin ekki svara­verð: „Ástar­bréf Árna til Róberts Wess­man“

Árni sagðist í grein sinni í dag vera óskaplega þreyttur að lesa ósannindi Halldórs í fjölmiðlum, en sjálfur setti hann spurningarmerki við ýmislegt í frásögn hans. „Hvað sem því líður er herferðin sem Halldór er í vel skipulögð – það liggur fyrir – enda maðurinn sérfræðingur í fjölmiðlaumfjöllun og vel tengdur í þeim geira.“

Í svari sem Halldór sendi frá sér í kvöld segist hann lengi hafa beðið eftir „málefnalegu svari“ frá stjórnum Alvogen og Alvotexh, sem og Róberti sjálfum. Hann hafi ítrekað óskað eftir því að fá að sjá niðurstöðu vegna ábendinga sinna á hendur Róberti en hafi ekki fengið svör.

„Ég tel að slökkviliðið hjá Alvogen undir stjórn Árna og Róberts hafi í raun aldrei gert neina rannsóknarskýrslu og engin lögfræðistofa fáist til að setja nafn sitt við slíkan hvítþott. Við Árni höfum áður þurft að verjast ásökunum á hendur Róbert, nú síðast haustið 2020 þegar breskur blaðamaður hafði rætt við fjölmarga stjórnendur fyrirtækisins. En það er hins vegar rétt hjá Árna, að það kunna fáir þá list betur en hann sjálfur, að slökkva elda og einmitt að gera starfslokasamninga við stjórnendur sem lenda upp á kant við Róbert,“ segir Halldór.

Segist hafa vitni sem „muni standa í lappirnar“ 

Halldór segir það undarlegt að „að ónafngreindur talsmaður Aztiq Fund“ saki sig um ósannindi og gangi svo langt að kalla hann lygara í umfjöllun Fréttablaðsins, en Aztiq Fund er fjárfestingafélag í eigu þeirra Róberts og Árna og var fréttakonan Lára Ómarsdóttir nýlega ráðin sem samskiptastjóri þess. Að sögn Halldórs eru engar upplýsingar að finna um Aztiq Fund á Íslandi sem nú sé farið að tjá sig fyrir hönd félaganna. „,Fyrirbærið er hvergi skráð hér á landi og ekki aðili að þessu máli.“

Hann segist vera „nauðbeygður“ til þess að verjast í fjölmiðlum og honum þyki dapurlegt að Árni kjósi að halda áfram með málið á þeim vettvangi. Alvogen hafi lagt fram stefnu þar sem þeir freisti þess að fá úr því skorið um hvort Halldór njóti stöðu uppljóstrara.

„Í því máli mun ég leggja fram ítarleg gögn og staðfestingar á öllu því sem ég hef rætt hingað til. Árni þarf engar áhyggjur að hafa af því að til séu vitni, sem muni standa í lappirnar þegar líkamsárásir verði til umræðu fyrir dómi,“ segir Halldór.

„Auðvitað liggur það fyrir að Róbert hótaði fyrrverandi samstarfsmönnum sínum lífláti og fjölskyldum þeirra, réðst í tvígang á nána samstarfsmenn með hnefahöggum og hefur borið óvildarmenn sýna þungum sökum, með andstyggilegum ásökunum. Það gefur auga leið að forstjóra sem verður uppvís að slíku, er tæplega hæfur í forystuhlutverk. Tilraun Árna til að tengja veikindi mín inn í þá umræðu er sérstaklega ósvífin.“

Hann segist vonast til að fá „fleiri ástarbréf frá Árna Harðarsyni lögfræðingi“, sem þekki vel til fyrirtækisins.

„Árni sjálfur hefur gegnt ýmsum hlutverkum innan Alvogen síðustu ár. Fyrst sem starfsmaður, svo allt í einu varð hann risastór hluthafi, en svo hentaði betur að hann ætti bara lítinn hluta. Í raun hefur verið ansi flókið og erfitt að fylgjast með fléttum Árna Harðarsonar í gegnum tíðina, sem vill síður láta sannleikann þvælast fyrir sér og er ávallt reiðubúinn að haga seglum eftir vindi.“