Fékk yfir hundrað skilaboð eftir viðtalið

Logi Pedro er gestur vikunnar í Einkalífinu. Logi vakti mikla athygli þegar hann mætti í viðtal til Sigmars Guðmundssonar á RÚV seint á síðasta ári þar sem hann talaði um rasisma og voru viðbrögðin við viðtalinu mikil.

„Ég bjóst aldrei við því að þetta yrði viðtal þar sem fólk myndi senda mér skilaboð eftir það en ég held ég hafi fengið yfir hundrað skilaboð. Ég veit ekki alveg hvað gerðist í viðtalinu, þetta bara gekk einhvern veginn upp, var skemmtilegt viðtal fyrir mig að fara í og mér finnst þægilegt að tala við Sigmar. Ég hef heyrt frá fólki að það hafi verið kannski gaman að fá mannlega nálgun á einhverja umræðu sem er oft í skotgröfum.“

Logi segir að það hafi fullt breyst þegar kemur að rasisma hér á Íslandi.

„Það hafa orðið allskonar vitundarvakningar til og allskonar hugtök orðið til sem snúa að einhverju sem maður hefur upplifað. Ég er í rosalegri forréttindastöðu sem Íslendingur af erlendum uppruna. Ég á rosalega sterkt bakland á Íslandi. Hlutirnir hafa breyst en Ísland er rosalega sterkt samfélag og það þarf oft ekki mikið til að kveikja á perum hjá fólki. Oft er bara nóg að taka góða umræðu og þá verða bara breytingar. Það er alveg geggjað að búa í þannig samfélagi, þú þarft kannski bara nokkra sem berja umræðuna í gegn og svo verða breytingar,“ segir Logi sem ræðir ítarlega um rasisma hér á landi og í heiminum í viðtalinu en umræðan hefst þegar um 11 mínútur eru liðnar af þættinum.

Í þættinum hér að ofan ræðir Logi einnig um Retro Stefsson tímann, samband sitt við bróðir sinn, Unnstein Manúel, um rasisma á Íslandi og í heiminum öllum og hvernig sú þróun hefur verið, um barneignir, kærustuna sína, nýja þætti sem hann er að byrja með á Stöð 2 og margt fleira.