Gera ráð fyrir að bólu­efni Jans­sen fái markaðs­leyfi fyrir helgi

Rúna segir ýmis jákvæð teikn á lofti þegar kemur að framleiðslu bóluefna og reiknar með því að Janssen fái skilyrt markaðsleyfi í Evrópusambandinu á fimmtudag eða föstudag og samdægurs á Íslandi.

„Þetta er líka bóluefni sem Ísland hefur tryggt sér mjög marga skammta af svo það verður mjög ánægjulegt þegar þetta bætist við. Síðan er kannski vert að benda á að bæði Pfizer og AstraZeneca hafa verið að vinna mjög hart að því að auka framleiðslugetu sína, einkum fyrir Evrópumarkað, og þá má kannski vænta þess að það fari eitthvað að fjölga í afhendingapökkunum sem við erum að fá.“

Minnst 190 þúsund skammtar fyrir lok júní

Í gær höfðu rúmlega 29 þúsund einstaklingar hafið eða lokið bólusetningu við Covid-19 hér á landi og fjölgaði í þeim hópi í dag. Samkvæmt núgildandi áætlunum Pfizer, AstraZeneca og Moderna áforma fyrirtækin að afhenda Íslendingum bóluefni fyrir 190 þúsund einstaklinga fyrir lok júní en einungis liggur fyrir afhendingaráætlun út mars eða apríl.

Rúna segir óljóst hvenær fyrsta sendingin af bóluefni Janssen berist til landsins en það yrði sennilega í fyrsta lagi í apríl. Svandís Svavarsdóttir heilbrigðisráðherra sagði í samtali við RÚV í dag að hún vænti þess að afhendingarætlun Janssen verði tilbúin fljótlega eftir að efnið fær markaðsleyfi og þar að auki sé brátt von á afhendingaráætlunum Moderna og Pfizer fyrir annan ársfjórðung.

„Við erum bara hóflega bjartsýn með þetta allt saman, það sem er að gerast er að markaðsleyfunum er að fjölga,“ segir Rúna en þrjú önnur bóluefni gegn Covid-19 eru komin í svokallað áfangamat hjá Lyfjastofnun Evrópu: Sputnik V og efnin frá Novavax og CureVac.

„Þá eru fyrirtækin farin að skila inn upplýsingum og rannsóknarniðurstöðum inn til Evrópsku lyfjastofnunarinnar sem mun þá flýta fyrir um leið og þau leggja inn umsókn fyrir markaðsleyfi.“

Af þeim þremur framleiðendum hefur Ísland einungis undirritað samning við CureVac um kaup á bóluefni fyrir 90 þúsund einstaklinga en heilbrigðisráðuneytið hefur gefið út að líklega verði gengið til samninga við Novavax eftir að fyrirtækið hefur lokið viðræðum við framkvæmdastjórn Evrópusambandsins.

Keypt bóluefni fyrir rúma tvo milljarða króna

„Mér finnst þetta vera mjög jákvæð teikn og ég held að ef horft er yfir allt þá sé alveg ótrúlegt að rétt rúmu ári eftir að þessi faraldur fór að láta á sér kræla þá sé fjórða markaðsleyfið að koma. Það er búið að þróa og framleiða bóluefni og farið að bólusetja milljónir manna um allan heim, ég held að það sé alveg ótrúlegt afrek.“

Fram kom um helgina að íslensk stjórnvöld hafi samið um kaup á bóluefni við Covid-19 fyrir 2.150 milljónir króna frá AstraZeneca, Janssen, CuraVac, Moderna og Pfizer/BioNTech. Duga skammtarnir fyrir um 630 þúsund manns en jafnframt hafa Íslendingar tryggt sér kauprétt á bóluefni fyrir 1.800 milljónir króna til viðbótar.