Á hundrað gleraugu og fékk 1 í Versló

Þar kom margt skemmtilegt fram og varð Villi að svara nokkrum mjög erfiðum spurningum.

Stjörnulögmaðurinn er um fimmtán mínútur að gera sig tilbúinn á morgnanna.

Hann segist eiga um hundrað gleraugu og þá er verið að tala um sólgleraugu og venjuleg gleraugu enda er hann með styrkleika í þeim öllum.

Vilhjálmur segist hafa flutt um það bil þúsund mál fyrir rétti. Eftir tuttugu ár ætlar hann sér að búa í Napolí enda fer hann þangað oft á ári.

„Ég hef oft velt því fyrir mér af hverju ég ætti að vera vakna í Garðabænum ef ég get vaknað í Napolí,“ segir Vilhjálmur.

Það sem kveikir í Vilhjálmi er góður húmor og kaldhæðni. Það sem kveikir aftur á móti ekki í honum er aðgerðarleysi.

Hann segir í raun að lögfræðin hafi valið sig.

„Ég var ekkert sérstaklega sleipur í stærðfræðinni. Ég var í Versló og betri í kjaftafögunum. Ég útskrifaðist t.d. með 1 og 1 í ólesinni og lesinni stærðfræði. Ég beitti eiginlega útilokunaraðferðinni þegar ég ákvað að fara í lögfræðina. Ef ég ætlaði í læknisfræðina þurfti ég að hafa einhvern grunn, ef ég ætlaði í viðskiptafræðina þurfti ég að hafa einhvern grunn, sama með verkfræði en þegar kom að lögfræðinni, þá þurfti ég ekki að kunna neitt. Þannig að fagið valdi mig,“ segir Vilhjálmur en hér að neðan má sjá innslagið í heild sinni.