Hafa sótt um tekjufallsstyrki fyrir 2,7 milljarða króna

Þetta kemur fram á vef fjármála- og efnahagsráðuneytisins. Þar segir að styrkirnir séu ætlaðir rekstraraðilum sem hafi þurft að sæta takmörkunum vegna sóttvarnarráðstana og sérstaklega fyrirtækjum sem hafi orðið fyrir meira en 40 prósenta tekjufalli.

Í tilkynningu ráðuneytisins segir einnig að forsvarsmenn rúmlega þrjú þúsund fyrirtækja og tugþúsundir einstaklinga hafi nýtt sér ýmis úrræði stjórnvalda. Þau séu á annan tug talsins og sé um styrki, lán og annað að ræða.

„Þannig hafa um 1.200 rekstraraðilar fengið lokunarstyrki fyrir um 1,7 milljarð króna og senn verður opnað fyrir umsóknir um viðspyrnustyrki sem Alþingi samþykkti í desember og er ætlað að tryggja að fyrirtæki geti viðhaldið nauðsynlegri lágmarksstarfsemi á meðan áhrifa faraldursins gætir og tryggt viðbúnað þegar úr rætist,“ segir í tilkynningunni.