Enginn greindist með veiruna í gær

Þrír greindust með kórónuveiruna hér á landi í fyrradag, samkvæmt bráðabirgðatölum frá almannavörnum, þar af voru tveir í sóttkví.

Almennt virðist hafa gengið vel að hefta útbreiðslu kórónuveirunnar yfir jólin að sögn Rögnvaldar Ólafssonar, aðstoðaryfirlögregluþjóns hjá almannavarnadeild ríkislögreglustjóra. Hann hrósar almenningi fyrir að hafa að mestu haldið sig við sína jólakúlu.

„Ég hugsa að við fáum tölur á morgun einhverjar en svona helgartölur, þær eru alltaf svolítið, það eru öllu færri sem mæta. Ég á í rauninni ekkert von á því að við fáum að sjá alvöru tölur fyrr en í lok næstu viku, þá svona erum við komin vel út úr fríinu og helginni og ættum að vera farin að sjá líka í rauninni hvernig við erum að koma undan áramótunum í raun og veru. Hvort að fólk sé með einkenni eftir áramótin og hvort að þetta sé einhvers staðar farið af stað. Það er náttúrlega alltaf hættan þegar fólk er ekki að mæta í prufur, þá náttúrlega getur þetta verið einhvers staðar þarna í felum,“ segir Rögnvaldur

„Ég held samt að heilt yfir þá sé alveg hægt að hrósa fólki með aðventuna og jólakúlurnar, í rauninni bara hvað það gekk vel og það er í rauninni bara í sjálfu sér bara mikið gleðiefni og frábært að það hafi gengið svona vel.“