Boltinn hjá Pfizer segir Þórólfur

Greint var frá því yfir hátíðisdagana að Þórólfur og Kári Stefánsson, forstjóri Íslenskrar erfðagreiningar hafi báðir rætt það við Pfizer að fá hingað til lands fleiri skammta af bóluefni fyrirtækisins gegn Covid-19 fyrr en reiknað er með. 

Óformlegar viðræður hafa staðið yfir síðan þá og segir Þórólfur í viðtali við fréttastofu að slíkar þreifingar muni halda áfram á næstunni.

„Ég býst við því að við heyrumst eitthvað áfram en það er ekki komin nein tímasetning á það. Við erum búin að senda gögn sem þeir eru að skoða,“ segir Þórólfur.

Vísindamenn Pfizer jákvæðir og áhugasamir um samstarf

Hann segir vísindamenn Pfizer vera bæði jákvæða og áhugasama í garð hins mögulega samstarfs.

„Þeir eru bara mjög jákvæðir. Þetta eru vísindamenn hjá Pfizer sem hafa áhuga á alls konar rannsóknum til að svara alls konar spurningum sem að eru í tengslum við bóluefni og við stilltum upp. Mér fannst þeir bara vera áhugasamir,“ segir Þórólfur.

Þórólfur hefur áður minnst á þessar spurningar sem mögulegt samstarf við Pfizer gæti svarað, svör sem gætu gagnast heimsbyggðinni allri, til að mynda hvenær hjarðónæmi gegn kórónuveiruni myndast.

Hvenær myndast hjarðónæmi?

„Það er það sem þessi rannsókn sem við erum að tala um að gera hér svarar. Hvenær er hjarðónæmi? Við vitum það ekki. Menn hafa slegið á það út frá ýmsum tölum að það gæti verið í kringum 60-70 prósent en það er bara ekki vitað nákvæmlega en það er hægt að svara því með svona rannsókn,“ segir Þórólfur.

Og spurningarnar og möguleg svör eru fleiri.

„Við getum líka séð hvort að bólusetningin virkar á mismunandi stofna eða afbrigði af veirunni. Við getum séð hvort að bólusetningin hafi óbein áhrif á þá sem eru óbólusettir. Við getum séð hvort að bólusetningin minnkar líkur á dreifingu, ekki bara sjúkdóminum, heldur dreifingu, að fólk sé að smita,“ segir Þórólfur.

Að hans sögn eigi vísindamenn Pfizer þó eftir að ræða samstarfið innanbúðar hjá fyrirtækinu.

„Þeir eiga náttúrúlega eftir að ræða við aðila innan fyrirtækisins hvort að það sé mögulegt að gera þetta. Við bíðum bara eftir því.“

Gott að fá já eða nei sem fyrst

Ljóst er að Þórólfur er ekki sá eini sem hefur unnið að því að ná athygli Pfizer, en Gísli Herjólfsson, forstjóri Controlant, sem kemur meðal annars að dreifingu bóluefnis Pfizer, sagði í gær að hann hefði farið eins hátt upp innan Pfizer og hann hefði aðgang að, til að láta vita af verkefninu.

Þórólfur treystir sér þó ekki til að segja neitt um hvenær svar geti legið fyrir frá Pfizer.

„Ég þori ekki að segja neitt um tímasetninguna. Bind vonir við að það verði bara sem fyrst. Ég held að það sé gott að klára þetta sem fyrst, já eða nei.“

Aðspurður hvort að svar geti fengist á næstu dögum segir Þórólfur bara að vera að bíða eftir svari.

„Boltinn er hjá þeim. Við erum búin að senda þeim gögn og bíðum bara eftir því hvað þeir segja.“