Sammála um að Borghildur beri ekki ábyrgð

Sem kunnugt er lét Jón Þór af störfum sem þjálfari kvennalandsliðsins vegna uppákomu eftir leikinn gegn Ungverjalandi fyrir tveimur vikum þar sem Ísland fagnaði því að vera komið á EM 2022. Jón Þór sagðist hafa farið yfir strikið í samtölum sínum við leikmenn landsliðsins er hann var undir áhrifum og hafi í kjölfarið glatað trausti leikmannanna. Hann hafi því ákveðið að hætta.

Borghildur var með í ferðinni til Ungverjalands en hún er varaformaður KSÍ og formaður landsliðsnefndar kvenna. Nokkuð hefur verið rætt um ábyrgð hennar í málinu en það var til að mynda ekki tekið fyrir á stjórnarfundi nokkrum dögum eftir leikinn í Ungverjalandi.

Rætt var um uppákomuna í Ungverjalandi á stjórnarfundi KSÍ á fimmtudaginn. Í skýrslu fundarins kemur fram að hvorki Borghildur né starfsfólk landsliðsins beri ábyrgð í þessu máli. Það hafi sinnt sínu starfi af fagmennsku í ferðinni.

„Eftir greinargóða yfirferð á málinu er stjórn einhuga og sammála um að varaformaður sambandsins, Borghildur Sigurðardóttir sem og starfsmenn A landsliðs kvenna, hafi sinnt starfi sínu í ferðinni og eftir hana af fagmennsku og beri á engan hátt ábyrgð á hegðun þjálfarans,“ segir í fundargerðinni.

Þar kemur einnig fram að rætt hafi verið um upplýsingagjöf innan stjórnar KSÍ og hvaða lærdóm stjórnin hægt sé að draga af málinu.

Fundargerðina má lesa með því að smella hér.