Flokkarnir fá tæpa þrjá milljarða úr ríkissjóði til eigin reksturs

Þeir stjórnmálaflokkar sem eiga fulltrúa á Alþingi, átta talsins, fá 728 milljónir úr ríkissjóði til að reka sig og sitt batterí á næsta ári. Á þessu kjörtímabili er það fé sem rennur beint til flokkanna tæpir þrír milljaðrar. Þetta kemur fram í Kjarnanum. „Versn­andi staða rík­is­sjóðs, sem áætlað er að verði rek­inn með 533 millj­arða króna halla árin 2020 og 2021, hefur engin áhrif á áætluð fram­lög úr rík­is­sjóði til stjórn­mála­flokka á næsta ári,“ segir þar.

Samkvæmt fyrirliggjandi fjárlagafrumvarpi munu flokkarnir skipta með sér rúmum 728 milljónum króna á árinu 2021, síðasta ári kjörtímabilsins en næstu alþingiskosningar eru í september að ári.

Meintar andlýðræðislegar gripdeildir

„Það er sama upp­hæð og áætlað er að stjórn­mála­flokk­arnir fái úr rík­is­sjóði í ár. Árið 2018, sem var fyrsta heila ár kjör­tíma­bils­ins, fengu þeir 648 millj­ónir króna og árið 2019 hæsta fram­lag sitt frá upp­hafi, 744 millj­ónir króna.“

Gunnar Smári Egilsson félagi í Sósíalistaflokknum, sem samkvæmt síðustu skoðanakönnun MMR er líklegt til að koma að fólki á þing eftir næstu kosningar segir þá sem þar skammta sér sjálfir fé spari sig ekki hvergi. 

„Þessar gripdeildir úr ríkissjóði eru framdir í nafni lýðræðis en eru í raun andlýðræðislegar. Framlög úr ríkissjóði styrkja stöðu elítunnar sem nær völdum í hverjum flokki, hún er ekki lengur háð félagsgjöldum eða framlögum almennra félaga. Og þingflokkarnir mæta til kosninga með fullar kistur fjár, fjölda fólks á launum, þeim framboðum sem vilja fella elítustjórnmálin.“

Versnandi staða ríkissjóðs skiptir engu máli

Að sögn Gunnars Smára, en þessa skoðun tjáir hann á Facebook, hafa flokkarnir að auki komið því svo fyrir að ríkið borgar formönnum flokka laun og skaffar þeim aðstoðarmenn fyrir utan það aðstoðarfólk sem þingflokkar ráða. „Hvernig þeir fundu það út að það væri almennings að borga formönnum í stjórnmálaflokkum laun, það er ofar mannlegum skilningi.“

Eins og fram kemur í ítarlegri frétt Kjarnans um þetta mál var það svo að sex stjórnmálaflokkar samþykktu tillögu um að hækka framlög til þeirra flokka sem komast inn á þing um 127 prósent skömmu eftir síðustu kosningar. „Frá þeim tíma, og fram að næstu kosningum, munu þeir flokkar sem sitja á þingi fá rúmlega 2,8 milljarða. Versn­andi staða rík­is­sjóðs, sem áætlað er að verði rek­inn með 533 millj­arða króna halla árin 2020 og 2021, hefur engin áhrif á áætluð fram­lög úr rík­is­sjóði til stjórn­mála­flokka á næsta ári.“