Utan­ríkis­ráð­herra Pól­lands hættir

Jacek Czaputowicz hefur sagt af sér embætti sem utanríkisráðherra Póllands. Afsögnin kemur á sama tíma og pólsk stjórnvöld þrýsta á að taka að sér leiðandi hlutverk í viðbrögðum Evrópusambandsins vegna ástandsins í nágrannalandinu Hvíta-Rússlandi.

Czaputowicz gaf í skyn í júlí að hann gæti brátt sagt af sér eftir að leiðtogar stjórnarflokksins, Laga og réttlætis (PiS) gáfu í skyn að von væri á hrókeringum í ríkisstjórn landsins og ráðherrum mögulega fækkað.

Miklar deilur hafa staðið í Hvíta-Rússlandi síðustu dagana í kjölfar forsetakosninganna þar sem landskjörstjórn þar í landi sagði forsetann Aleksandr Lúkasjenkó hafa hlotið um 80 prósent atkvæða. Hafa mikil mótmæli verið á götum borga og fjölmargir fordæmt framkvæmd kosninganna og þá hefur ESB greint frá því að viðskiptaþvingunum verði beitt gegn Hvíta-Rússlandi.

Stjórnvöld í Hvíta-Rússlandi hafa kennt afskiptum erlendra aðila um mótmælin og sagði Mateusz Morawiecki, forsætisráðherra Póllands, að hann hefði ekki áhyggjur af stöðunni en að ESB skyldi vinna að því að koma í veg fyrir að Hvíta-Rússland væri svo háð Rússlandi.

Afsögn utanríkisráðherrans nú er önnur afsögn pólsks ráðherra á örfáum dögum, en fyrr í vikunni sagði heilbrigðisráðherrann Lukasz Szumowski, af sér í kjölfar fjölgunar kórónuveirusmita í landinu.

Jacek Czaputowicz hafði gegnt embætti utanríkisráðherra Póllands frá janúar 2018.