Björn gæti farið í næstefstu deild Noregs

Björn Bergmann Sigurðarson, landsliðsmaður í fótbolta, gæti verið á leið aftur til Lilleström í Noregi þar sem hann lék við góðan orðstír á árunum 2009-2012.

Björn er í dag leikmaður Rostov í Rússlandi og með samning við félagið fram á næsta sumar, en hann var að láni hjá APOEL á Kýpur fyrri hluta þessa árs. Björn kom til Rostov frá Molde í ársbyrjun 2018, eftir að hafa einnig leikið með Wolves á Englandi og FC Köbenhavn eftir að hann yfirgaf Lilleström.

„Ég hef verið í góðu sambandi við Björn síðan hann fór frá Lilleström. Við höfum rætt mikið samna og hann hefur aldrei farð leynt með að hann gæti vel hugsað sér að koma aftur til Lilleström þegar það væri rétti tíminn til þess,“ sagði Simon Mesfin, íþróttastjóri Lilleström, við Romerikes Blad.

„Ég get staðfest að sá tími er núna, en það er ekkert frágengið. Tíminn er kannski réttur en það þarf að ganga frá kostnaðarhliðinni. Það er það sem við erum að ræða um núna,“ sagði Mesfin.

Lilleström leikur í næstefstu deild og er aðeins í 9. sæti eftir átta umferðir, en tímabilið í Noregi hófst mun seinna en ella vegna kórónuveirufaraldursins. Liðið féll úr úrvalsdeildinni í fyrra á markatölu, og var aðeins tveimur mörkum frá því að halda sér uppi.

Björn skoraði 16 mörk í norsku úrvalsdeildinni árið 2017 fyrir Molde, síðast þegar hann spilaði í Noregi.

Björn á að baki 17 A-landsleiki, þar á meðal þrjá á HM í Rússlandi 2018. Hann lék síðast með liðinu um haustið það ár en hann missti af landsliðsverkefnum á síðasta ári vegna meiðsla.