Þrífst á samkeppni og er fyrirmynd fyrir aðra leikmenn deildarinnar

Það var mikið um að vera á lokadegi félagaskiptagluggans hér á landi en stærstu skiptin voru eflaust þau að Guðjón Pétur Lýðsson er orðinn leikmaður Stjörnunnar. Hann kemur á láni frá Breiðabliki.

„Það er mikil samkeppni hjá Stjörnunni en Guðjón Pétur er leikmaður sem þrífst á samkeppni. Hann er leikmaður sem aðrir fótboltamenn eiga að taka til fyrirmyndar,“ sagði Máni Pétursson, einn af sérfræðingum Pepsi Max Stúkunnar. 

„Að fá Guðjón Pétur í Stjörnuna er mjög mikilvægt. Hann er fyrirmynd fyrir unga drengi sem þurfa alltaf að vera með öruggt byrjunarliðssæti og byrja að væla eða kvarta þegar þeir eru ekki í liðinu. Þannig leyfa þeir þjálfaranum að brjóta sig niður. Guðjón er ekki þannig, hann lætur það ekki hafa nein áhrif á sig,“ sagði Máni.

Máni sagðist hafa heyrt eftirfarandi frá gömlum þjálfara Guðjóns: „Ef að þjálfarinn sagði Guðjóni að hann yrði á varamannabekknum í næsta leik þá var hann reglulega besti leikmaður liðsins á æfingu fyrir leik og endaði á að skora í næsta leik.“

„Hann er með hugarfar sem hefur lengi vantað í Stjörnuna. Guðjón Pétur tekur allri samkeppni fagnandi og til að mynda þegar Valur var að styrkja sig þá tók Guðjón best á móti leikmönnum sem spiluðu hans stöðu. Guðjón fagnaði samkeppninni og horfði á það þannig að þeir myndu gera hann að betri leikmanni.“

„Guðjón þrífst einfaldlega á því að vera í besta liðinu og með besta leikmannahópinn. Það segir sitt að hann hafi valið Stjörnuna frekar en önnur lið þar sem honum var nánast lofað byrjunarliðssæti. Guðjón vill hafa fyrir hlutunum og hann væri aldrei að mæta í Stjörnuna ef hann hefði ekki trú á því að hann gæti haft áhrif á liðið og leikmannahópinn.“

Máni benti svo pent á það að Stjarnan hefur aldrei orðið Íslandsmeistari – karla megin allavega – án þess að það sé Álftnesingur í leikmannahópi liðsins.

„Ég fagna því að Stjarnan hafi náð í Guðjón Pétur. Þeir hafa gert tilraunir til þess áður og klúðrað því á ævintýralegan hátt oftar en einu sinni. Þeir þurfa karakterinn sem Guðjón er og ég held að þetta séu ótrúlega gott fyrir Stjörnuna.“

Máni telur að fjarvera Guðjóns gæti haft áhrif á Blikana þegar fram líða stundir.

„Ég held það hafi ekki verið draumastaða fyrir Breiðablik að senda Guðjón í Stjörnuna. Þeir vildu frekar senda hann í lið sem væri ekki í jafn mikilli samkeppni en Guðjón vildi bara ekki fara neitt annað. Hann vildi bara fara í Garðabæinn.“

„Ég veit ekki hversu mikil áhrif þetta mun hafa á Blikana. Þeir eru náttúrulega ótrúlega vel mannaðir á miðsvæðinu. Mögulega hefur þetta áhrif þegar það fer að líða á tímabilið og reynslan fer að spila meiri þátt. Þar hefði Guðjón geta komið sterkur inn.“

„Það er oft þannig að þegar þjálfarar koma inn þá vilja þeir fá sína menn. Guðjón er þannig að hann spyr mikið af spurningum og ef hann er ekki sammála þjálfaranum þá lætur hann vita af því. Það er spurning hvort Óskar Hrafn [Þorvaldsson, þjálfari Blika], hafi ekki haft þolinmæði fyrir því.

„Ég er ekki endilega viss um að þetta sé síðasta púslið, það vantar fleiri leikmenn í Stjörnuna sem geta sprengt leiki upp á sitt einsdæmi. Leikmennirnir sem liðið hefur til þess eru enn of ungir til að axla þá ábyrgð en möguleikar Stjörnunnar á að verða meistari í haust eru miklu betri en þeir voru áður en Guðjón Pétur kom,“ sagði Máni að lokum.