Vigdís talin best 116 umsækjenda

Vigdís Jóhannsdóttir varð hlutskörpust þeirra 116 sem sóttu um stöðu markaðsstjóra Stafræns Íslands. Um er að ræða svokallaða verkefnastofu sem ætlað er að aðstoða ráðuneyti, stofnanir og aðra opinbera aðila við taka upp stafrænar lausnir í auknum mæli.

Andri Heiðar Kristinsson var í upphafi árs kynntur til leiks sem stafrænn leiðtogi í fjármála- og efnahagsráðuneytinu. Þá kom fram að efling stafrænnar þjónustu væri eitt af forgangsmálum stjórnvalda og hefði ríkisstjórnin ákveðið að stafræn samskipti verði meginsamskiptaleið almennings við hið opinbera fyrir lok ársins 2020.

Vigdís fær nú það verkefni að leiða innri og ytri markaðs- og kynningarmál verkefnastofunnar með áherslu á vefinn Ísland.is.

Hún er viðskiptafræðingur að mennt, starfaði um árabil hjá 365 miðlum og var þar bæði verkefnastjóri á markaðsdeild og kynningarstjóri útvarps. Vigdís hóf störf hjá auglýsingastofunni Pipar/TBWA árið 2009 og gegndi þar stöðu aðstoðarframkvæmdastjóra frá árinu 2017.