Slökkviliðsmenn á Snæfellsnesi styrkja gjörgæsluna

Starfsmannafélag slökkviliðs Snæfellsbæjar hefur ákveðið að veita styrktarfélagi gjörgæsludeildar Landspítalans rausnarlega gjöf.

Slökkviliðsmenn hafa allir keypt boli með merkingunni „Ég hlýði Víði“ og mun starfsmannafélagið gefa 100.000 krónur til Vonar, styrktarfélags gjörgæsludeildar þar sem sjúklingum sem þungt haldnir eru vegna kórónuveirunnar er sinnt.

„Starfsmannafélag Slökkviliðs Snæfellsbæjar er ákaflega þakklátt fyrir það frábæra og vandasama starf sem á sér stað hjá heilbrigðisstarfsmönnum landsins þessa dagana, við heyrðum af söfnuninni til styrktar gjörgæslunni og erum að sjálfsögðu með í henni enda um frábært framtak að ræða. Viljum við skora á önnur Slökkvilið á landinu að gera slíkt hið sama,“ segir í tilkynningu.