Faðir ósáttur við vinnubrögð lögreglu í máli lektors við HÍ

Maðurinn sem handtekinn var á jóladag og úrskurðaður í gæsluvarðhald grunaður um kynferðisbrot og frelsissviptingu heitir Kristján Gunnar Valdimarsson. Hann er lektor við lagadeild Háskóla Íslands og hefur gjarnan verið álitsgjafi í fjölmiðlum um skattaleg málefni.

Faðir 24 ára gamallar konu sem talið er að hafi verið frelsissvipt á heimili Kristjáns er afar ósáttur við vinnubrögð lögreglu sem hann telur hafa bjargað dóttur hans alltof seint.

Lögreglan á höfuðborgarsvæðinu sendi frá sér tilkynningu vegna málsins í morgun. Þar kom fram að karlmaður á sextugsaldri hefði verið handtekinn á jóladag og úrskurðaður í gæsluvarðhald fram til sunnudagsins 29. desember, vegna gruns um kynferðisbrot og fleira.

Telur að staða Kristjáns sem lektors hafi haft áhrif á vinnubrögð lögreglu

Gunnar Jónsson, faðir konunnar sem Kristján er grunaður um að hafa brotið gegn, segir hana hafa verið á heimili Kristjáns í að minnsta kosti tíu daga áður en henni var bjargað þaðan aðfaranótt aðfangadags. Gunnar telur að staða mannsins sem lektors við HÍ hafi haft áhrif á vinnubrögð lögreglu.

„Okkur var sagt það áður en við fórum með lögreglunni að ná í dóttur okkar að við skyldum átta okkur á því að hann væri löglærður og við skyldum ekki fara þarna inn nema með hans samþykki,“ segir Gunnar í samtali við fréttastofu.

Gunnar kveðst fyrst hafa kallað til lögreglu vegna dóttur sinnar þann 22. desember. Þá fór lögregla að heimili Kristjáns en vildi lítið sem ekkert gera þar sem Kristján sagði að unga konan væri í góðum málum og vildi hvorki tala við lögreglu né foreldra sína.

„Það hefði verið réttast og eðlilegast af því við sáum fíkniefni að lögreglan hefði farið inn í íbúðina. Það var ekki gert og ég var ósáttur við það.“

Ekki auðvelt að standa fyrir utan og geta ekki náð í stelpuna

Á Þorláksmessukvöld kölluðu foreldrar konunnar svo aftur á lögreglu. Það gerðu þau eftir að hafa sent unga manneskju inn á heimili Kristjáns undir því yfirskini að hún væri á leið í partýið sem þar var í gangi. 

Manneskjan sendi svo foreldrunum skilaboð um að dóttir þeirra væri í annarlegu ástandi í húsinu og að á heimilinu væru eiturlyf og sprautur. Foreldrarnir kölluðu þá aftur á lögregluna. 

Á svipuðum tíma og lögregla kom á vettvang kom dóttir Gunnars út af heimili Kristjáns, í mjög annarlegu ástandi. Var hún flutt með sjúkrabíl á Landspítalann þar sem hún dvelur enn.

„Ég hefði bara auðvitað viljað fá stelpuna fyrra kvöldið. Það er ekkert grín að koma á svona stað og sjá þetta með svona augum hvernig þetta leit út. Hvað þetta var ógeðslegt og þurfa að standa fyrir utan og ná ekki í stelpuna sína, það er ekki auðvelt.“

Handtekinn tvisvar á rúmum sólarhring

Samkvæmt upplýsingum frá lögreglu var Kristján handtekinn aðfaranótt aðfangadags og færður á lögreglustöð til skýrslutöku. Honum var sleppt að henni lokinni.  

Rúmum sólarhring síðar, aðfaranótt jóladags, var Kristján svo aftur handtekinn á heimili sínu. Á jóladag var hann síðan úrskurðaður í gæsluvarðhald fram til sunnudagsins 29. desember.

Saga Ýrr Jónsdóttir, réttargæslumaður konunnar, tekur í sama streng og Gunnar.

 

„Það átti að bjarga stelpunni þarna sólarhring áður enda ljóst miðað við lýsingar að lögreglan sá fíkniefni þarna inni og það eitt og sér er nóg til að fara inn. Óafsakanleg vinnubrögð,“ segir Saga Ýrr.

Fréttastofa leitaði einnig eftir viðbrögðum frá Háskóla Íslands vegna stöðu Kristjáns þar. 

„Þetta eru alvarlegar ásakanir sem koma fram í fjölmiðlum. Ég get ekki tjáð mig um málið opinberlega en get staðfest að það er í tilteknum farvegi hér í háskólanum,“ segir Jón Atli Benediktsson, rektor HÍ.

Samkvæmt heimildum fréttastofu var Kristján kallaður á fund í háskólanum fyrir jól til að ræða framtíð hans innan stofnunarinnar en hann mætti ekki.

Nánar verður rætt við Gunnar og Sögu Ýrr í fréttum Stöðvar 2 í kvöld.

Fréttin hefur verið uppfærð með viðbrögðum HÍ.